Jekk xi ħadd irid ikun l-ewwel wieħed

L-Ħamsa u Għoxrin Ħadd taż-Żmien ta’ Matul is-Sena B

Tista’ ssegwi l-qari kollu bil-Lingwa tas-Sinjali Maltija.

Lectio Divina

Il‑qari liturġiku ta’ dan il‑Ħadd ikompli ma’ dak tal‑Ħadd ta’ qablu kemm fl‑istil kif ukoll fil‑messaġġ tiegħu.

L‑ewwel qari meħud mill‑Ktieb tal-Għerf faċilment iqanqal bosta emozzjonijiet fil‑bniedem għaliex huma bosta dawk li f’xi waqtiet tal‑ħajja għaddew jew huma għaddejjin minn esperjenzi simili deskritti ċari ħafna mill‑awtur sagru. Huma esperjenzi iebsin li l‑bnedmin bla kuxjenza, sabiex jostru għemilhom, ma jħallux lill-bniedem fis‑sewwa jgħid il‑verità, imma jippjanaw sal‑inqas dettall kif se jwarbbuh min-nofs, kif se jeħilsu minnu. Jaslu għal dan bl‑agħar forma ta’ mewt: l‑assassinju tal‑karattru, billi jġiegħluh jgħaddi ħajtu fil‑mistħija! Mhux hekk biss, imma riedu saħansitra jinqdew bit-tiġrib tal-bniedem ġust biex iġarrbu lil Alla wkoll.

Imma l‑bniedem ġust hu mibni fuq is‑sod, qalbu hi ta’ Alla. Għalhekk, fis‑Salm naraw l‑istqarrija mimlija umiltà ta’ dan il‑bniedem meta b’fiduċja sħiħa f’Alla jgħid: “Il‑Mulej hu li jżommni.” X’kuntrast mal‑Ewwel Qari, fejn il‑bniedem ħażin, mimli bih nnifsu, jaħseb li hu fil‑kontroll ta’ kollox, meta mqabbel mal-kliem tal‑bniedem ġust li bl‑akbar umiltà jerħi lilu nnifsu u l‑kawża tiegħu f’idejn Alla.

Fit‑Tieni Qari meħud mill‑Ittra ta’ San Ġakbu, naraw il‑kawża u xi effetti tal‑ħażen, u mbagħad lejn it‑tmiem tal‑qari l‑awtur joffrilna sfidi u għajnuniet ta’ kif negħlbu dan il‑ħażen. L‑għerq tal‑ħażen, jgħidilna San Ġakbu, jiġi mill‑għira li timmanifesta ruħha fi ġlied, f’tilwim u f’nuqqas ta’ rażan li jwassal għal kull xorta ta’ ħażen u ta’ sodisfazzjon ta’ passjonijiet qarrieqa li jneżżgħu lill‑bniedem minn kull dinjità lejh innifsu u lejn l‑oħrajn. Imma ma jiqafx hemm. L‑awtur jisfidna fil‑ġewwieni tagħna billi jgħidilna li aħna ma għandna xejn, aħna persuni vojta għaliex ma nitolbux, għaliex warrabna lil Alla u floku nitpaxxew fl‑edoniżmu sfrenat li ffabrikajna biex jimla l‑vojt li ħloqna b’idejna stess.

Forsi tajjeb li wieħed isaqsi: Imma għaliex il‑bniedem jasal biex jaqa’ daqshekk fil‑baxx u jħalli l‑għira tieħu t‑tmun ta’ ħajtu? Tgħid jiġri hekk għax il‑bniedem tant hu mimli bih innifsu li jaħseb li ħadd ma jista’ għalih, li għandu l‑kontroll ta’ kollox u ta’ kulħadd, imma fil-verità ma jkollu kontroll ta’ xejn jekk ma jkollux tiegħu nnifsu? Forsi jasal għal dan sforz il‑biża’ mill‑verità li tiġi minn Alla u minn xi wħud ta’ madwaru?

Il‑qari tal‑Evanġelju meħud minn San Mark, jissinkronizza perfettament mal-Ewwel Qari rigward it-tiġrib tal-bniedem ġust u jaqbel perfettament mat-Tieni Qari fil-kawża ta’ dan it-tiġrib. Ġesù stess ħabbar minn xiex kellu jgħaddi u kif ukoll ħabbar il‑qawmien tiegħu mill‑mewt, frott il-fiduċja sħiħa tiegħu f’Alla. Imma l‑appostli, meta semgħu dan, tefgħu l‑attenzjoni tagħhom xi mkien ieħor—bdew jaraw min minnhom, fl‑assenza ta’ Ġesù, se jeħodlu postu, min se jkun il‑kbir fosthom. Xi dgħufija! Ġesù għaraf dan kollu, u ta lilhom u lilna tagħlim qawwi ħafna dwar il‑qofol tal‑kobor veru tal‑bniedem li nsibuh fl‑umiltà u fis‑sempliċità li twassal għat‑telqa totali tal‑bniedem f’idejn Alla b’fiduċja sħiħa fih. Dawn il-mezzi, li tant għandna bżonnhom fil‑mixja tagħna fil‑fidi u fil‑ħajja ta’kuljum, iwasslu lill- bniedem sabiex jibqa’ jfittex bl-akbar serjetà lil Alla, u meta jiskoprih u jilqgħu f’ħajtu jasal biex jaqdih b’fiduċja u jaqdi lil ħutu l‑bnedmin b’qalb umli.

Forsi tajjeb nirriflettu ftit: L‑umiltà tbeżżagħni? Nitkexkex nerħi r‑riedni ta’ ħajti f’idejn Alla? Nista’ ngħid li jiena bniedem li għandi l‑paċi fija? Il‑qari liturġiku tal-lum kif jisfida l‑ġewwieni tiegħi? Xi jrid jgħidli Alla permezz ta’ dan il‑qari?

Nistedinkom tirriflettu ftit fuq sentenza li sibt dan l‑aħħar: “hu meħtieġ ħafna ċokon biex inkunu tassew kbar.” Jikkumplimenta dan insibu l‑kliem ta’ R. H. Benson: “Li tħossok tassew ċkejken u mhux importanti hija dejjem sensazzjoni ta’ ġid.”

Talba

Mulej Ġesù, inti taf il‑ġewwieni tiegħi; taf min huma dawk li jridu jġarrbu lili u lilek. Tħallini qatt nogħtor quddiem ħżunithom; tħallini qatt nitlef ħarsti minn fuqek, imma flimkien mas‑Salmista nitolbok żommni fis‑sod.

Mulej, imlieli qalbi b’dik l‑umiltà ġenwina li tgħarraf il‑kobor tiegħek u l‑kruha tal‑għira. Mulej, saħħaħ fija s‑sabar u t‑tjubija sabiex nibqa’ nfittxek u nilqgħek f’ħajti.
Ammen.

The post Jekk xi ħadd irid ikun l-ewwel wieħed appeared first on Behold.