Il-Ġisem u d-Demm ta’ Ġesù
It-Tieni Ħadd fuq Għid il-Ħamsin
Kolletta
O Alla, int f’dan is-sagrament tal-għaġeb ħallejtilna t-tifkira tal-Passjoni tiegħek; agħtina, nitolbuk, li nqimu l-misteru tal-Ġisem u d-Demm tiegħek hekk li nħossu fina bla heda dak li rebbħitilna l-fidwa tiegħek, Int li int Alla, u tgħix u ssaltan ma’ Alla l-Missier flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Nimmaġinaw lil Ġesù, imdawwar bil-folol li kienu jmorru warajh, uħud kellhom għatx għall-kelma tiegħu, oħrajn għall-fejqan. Ġesù dejjem b’idejh miftuħa, lest li jilqa’ bi mħabba u jqassam b’ġenerożità lil kull min jersaq lejh. B’kuntrast għall-attitudni ta’ Ġesù għandna dik tat-Tnax li jgħidu lil Ġesù biex jibgħat lin-nies sabiex jaħsbu għal rashom u “jsibu fejn jistrieħu u jieklu xi ħaġa” (v. 12).
Ġesù ma jaħsibhiex bħat-Tnax. Ġesù jrid li d-dixxipli tiegħu mhux biss ikunu b’għajnejhom miftuħa għall-ħtiġijiet tal-oħrajn iżda jkollhom ukoll qalbhom miftuħa, lesti li jaqsmu dak li huma u dak li għandhom mal-proxxmu fil-bżonn. Għaldaqstant, Ġesù jaħsadhom meta jazzarda jpoġġi r-responsabiltà tal-folol fuq spallejhom: “Agħtuhom intom x’jieklu” (v. 13). Għal darb’oħra l-ħsieb tat-Tnax huwa ’l bogħod minn dak ta’ Ġesù. L-ewwel ħaġa li tiġihom f’moħħhom hi li ma jistgħux jagħmlu dak li qed jitlob minnhom l-Imgħallem: “Ma għandniex aktar minn ħames ħobżiet u żewġ ħutiet …” (v. 13). Iżda Ġesù jilqa’ l-ftit li għandhom, jerfa’ għajnejh lejn is-sema, ibierku u jaqsmu, u jagħtihulhom biex inewluh lin-nies. “U kulħadd kiel u xaba’” (v. 17).
Jekk nagħtu ħarsa madwarna żgur li nilmħu nies bil-ġuħ: bil-ġuħ għal sempliċi tbissima, bil-ġuħ għal qalb li tisma’ u tagħder, bil-ġuħ għal sens u skop fil-ħajja, bil-ġuħ għall-ferħ li jibqa’, bil-ġuħ għall-kelma ta’ faraġ, bil-ġuħ għall-imħabba. Illum Ġesù qed jgħidilna, “Agħtuhom intom x’jieklu.” Jista’ jiġrilna bħat-Tnax u naħsbu li m’għandniex minn fejn nagħtu, m’għandniex ħin, m’aħniex kapaċi, hemm ħaddieħor li jista’ jgħin, u elf skuża oħra. Il-Kelma tal-lum tgħallimna li bil-qawwa tal-imħabba tiegħu Ġesù jkattar kull offerta li aħna nagħmlu minkejja l-faqar tagħna. Tabilħaqq, jekk inħalluh, Ġesù jista’ jibdel il-faqar tagħna f’abbundanza. Ġesù jbierek u jaqsam l-offerta tagħna bħalma għamel bil-ħames ħobżiet u ż-żewġ ħutiet. Mhux talli kielet il-folla, talli baqa’ ż-żejjed ukoll.
Dan hu s-sagrament tal-imħabba li qed niċċelebraw dan il-Ħadd, fis-Solennità tal-Ġisem u d-Demm ta’ Ġesù, li tana lilu nnifsu kollu kemm hu, u għoġbu jibqa’ magħna fl-Ewkaristija. Kull darba li aħna nirċievu l-Ġisem u d-Demm ta’ Kristu nkunu qegħdin nilqgħu l-istedina ta’ Ġesù: “Agħtuhom intom x’jieklu.” Xi grazzja tkun għalina jekk inħallu lil Ġesù Ewkaristija jibdilna fih biex aħna nsiru dak li nirċievu. Ejjew inkunu ġenerużi u noffru dak li aħna u dak li għandna lill-Mulej sabiex ibierku u jaqsmu għall-ġid komuni.
Ieqaf u Aħseb
– L-Ewkaristija li nirċievu qegħdin inħalluha tibdilna fi Kristu?
– Kif qegħdin ngħixuha l-Ewkaristija? Qegħdin naqsmu dak li aħna u dak li għandna mal-proxxmu tagħna?
Talba
Triqatek, Mulej, għarrafni,
il-mogħdijiet tiegħek għallimni.
Mexxini fis-sewwa tiegħek u għallimni,
għax int Alla tas-salvazzjoni tiegħi.
Għalik nixxennaq il-jum kollu.
Salm 25, 4-5
The post Kulħadd kiel u xaba’ appeared first on Behold.
Ikkummenta