Is-Sbatax-il Ħadd taż-Żmien ta’ Matul is-Sena
Kolletta
O Alla, li tħares lil min jittama fik, mingħajrek xejn ma jiswa, xejn ma hu qaddis; kattar fuqna l-ħniena tiegħek, u kun int li taħkem fuqna u tmexxina, ħalli ninqdew tajjeb bil-ġid li jgħaddi hekk li nagħrfu norbtu ruħna minn issa mal-ġid li jibqa’ għal dejjem. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
It-tema prinċipali tal-Evanġelju hija t-Talb. Hija tema bi tliet friegħi: it-talb bħala relazzjoni; Alla li jixtiqilna l-ġid, u allura l-providenza tiegħu; il-perseveranza fit-talb.
L-appostli indunaw mir-relazzjoni qawwija li Ġesù kellu ma’ Alla l-Missier, u riduh jgħallimhom kif huma wkoll ikollhom din ir-relazzjoni. Riedu li huma wkoll jikbru fir-relazzjoni ma’ Alla l-Missier. Għalhekk talbuh jgħallimhom jitolbu.
– La qegħdin nitolbu lill-Missier u aħna wliedu, mela lkoll flimkien irridu naħdmu għall-paċi, għal Saltnatu, kemm fuq livell personali, bit-tisħiħ tar-relazzjoni tagħna miegħu, u kif ukoll fuq livell universali.
– Il-għajxien, il-providenza ta’ Alla ma tonqos qatt. Fid-dinja nafu li hawn ikel għal kulħadd, imma mhux kulħadd qiegħed jiekol. Kif jista’ jkun li jkollna relazzjoni tajba ma’ Alla u mbagħad ngħumu fl-individwaliżmu u fl-egoiżmu? Ugwaljanza mingħajr ekwità ma tħallix frott mixtieq.
– Il-maħfra l-akbar sfida tal-Kristjan. Jekk tixtieq li tiġi maħfur, għaliex ma taħfirx?
– Lejn l-aħħar insibu kliem ta’ fiduċja għal għajnuna, għal ħniena, għall-grazzja Tiegħu f’mumenti fejn bil-libertà tagħna nidħlu fit-tiġrib.
Il-Missierna, talba li tgħallimnieha sa minn ċkunitna, hija talba relazzjonali; talba li xħin taħseb fuqha titlob impenn qawwi minna l-Insara. Hija talba li titlob fidi u ħafna fiduċja.
Ġieli nisimgħu, “Xbajt nitlob,” “Għalxejn nitlob,” jew “Alla nesini,” “Alla jagħti lil min irid,” “ilni nitlob u ma naqlax.” Kliem bħal dan u ieħor simili iġegħilni naħseb: imma kif għad hawn min jaħseb li t-talb huwa xi bakketta maġika? Kif għad hawn min jaħseb li lil Alla nixtruh billi nixgħellu li erba’ xemgħat … donnu rridu nħallsuh qabel!!!
Aħna nitolbu dak li naħsbu li hu tajjeb għalina fil-ħin li aħna naħsbu li hu tajjeb. Alla jara fil-bogħod bil-wisq aktar minna. Hu jaf eżatt x’għandna bżonn u meta. Nemmnu li ż-żmien (timing) tal-Mulej huwa wisq differenti minn tagħna? Aħna nitolbu, nitkellmu, niddjalogaw ma’ Alla għaliex hekk jagħmlu l-ulied, il-ħbieb ma’ min iħobbhom: jiddjalogaw u jiftħu qalbhom bl-akbar fiduċja għax jemmnu li ma’ min qegħdin jitkellmu jixtieqilhom il-ġid, jemmnu fl-imħabba bla qies ta’ min qed jismagħhom.
Intom taħsbu li Missierna li huwa fis-smewwiet se jagħtina xi ħaġa li mhix tajba għalina, fil-ħin/żmien li għandna bżonnha? Mulej, kattar fina l-Fidi … fiduċja!
Tema oħra li torbot dan kollu hija l-perseveranza fit-talb: li nibqgħu nitolbu, mhux għax Alla jrid jumiljana jew jinkina, imma għaliex meta titlob qiegħed tħobb, qiegħed iġġedded ir-relazzjoni, u Alla jridna ma naqtgħux qalbna, ma niddubitawx minn imħabbtu, imma jridna nkomplu niddjalogaw miegħu, għax imħabbtu hija immensa. It-talb, li huwa att ta’ mħabba, ma jbiddilx lil Alla li huwa l-istess imħabba, imma jbiddel lilna. Taqtax qalbek … ibqa’ miexi, ibqa’ ħobb.
The post Itolbu u jingħatalkom appeared first on Behold.
Ikkummenta