L-Ewwel Ħadd tar-Randan Sena A
Kolletta
O Alla li tista’ kollox, bit-taħriġ ta’ kull sena matul ir-Randan imqaddes agħtina li nifhmu dejjem iżjed il-misteru ta’ Kristu, u li b’ħajja xierqa niksbu l-frott tiegħu. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.
Ammen.
Riflessjoni
Filwaqt li l-Knisja tistedinna kontinwament għall-konverżjoni, matul iż-żmien tar-Randan din is-sejħa issir b’aktar intensita’. Permezz tas-siltiet mill-Iskrittura magħżula biex jiġu pproklamati waqt iċ-ċelebrazzjoni ewkaristika ta’ matul dan iż-żmien, il-Knisja tgħinna biex nifhmu tassew kif nistgħu nesperjenzaw din il-konverżjoni. U -ċiklu ta’ qari li jsir fis-Sena A huwa qari li sa mill-ewwel sekli tal-Knisja kien magħżul sabiex jakkumpanja lil dawk li jkunu se jitgħammdu f’Sibt il-Għid permezz ta’ riti li jrisu f’dawn il-Ħdud.
Il-qari tal-Kelma ta’ Alla llum ifehimna aħjar għaliex għandna nikkonvertu, lejn xiex għandna nikkonvertu, u min Hu dak li permezz tiegħu aħna nistgħu nikkonvertu.
Il-qari mill-Ktieb tal-Ġenesi jiddiskrivilna l-istat oriġinali tal-bniedem bħala dak il-ħlejqa maħluqa minn Alla xbieha tiegħu. Alla żejjen lill-bniedem b’ħafna kwalitajiet sbieħ, fuq kollox bil-libertà—tant li uża din l-istess libertà biex idur kontra l-Ħallieq tiegħu stess u ried isir daqsu! Għaldaqstant, li nikkonvertu jfisser li nerġgħu lura għal dak l-istat ta’ ħbiberija intima ma’ Alla li kellu l-bniedem fil-bidu tal-ħolqien Mhix relazzjoni mibnija fuq il-liġi u l-biża’ imma waħda mibnija fuq l-imħabba.
Ħafna minna għadhom jiftakru ċar ħafna mistoqsija u tweġiba li kienu jsiru fl-ewwel snin tal-katekeżi: “Għalfejn ħalqek Alla?” “Alla ħalaqni biex nagħrfu, nħobbu u naqdih, u hekk wara din il-ħajja immur nithenna bih għal dejjem.” Il-konverżjoni ġenwina tikkonsisti f’dawn it-tliet passi. L-ewwel li ngħarfu lil Alla bħala dak li tassew hu: il-Ħallieq u l-Missier ta’ kulħadd. It-tieni pass hu li tassew inħobbuh: li Hu jiġi dejjem u f’kollox fl-ewwel post f’ħajjitna; li qalbna tħabbat ma’ dik tiegħu. Iżda l-konverżjoni sinċiera ma ssibx il-milja tagħha jekk ma twassalx għall-qadi ta’ Alla, l-iktar billi nagħrfu x’inhi r-rieda ta’ Alla f’ħajjitna u nagħmluha.
Jekk niflu tajjeb il-qari tal-Evanġelju tal-lum skont San Mattew, insibu lil Ġesù jsegwi dan il-proċess fit-taqbida tiegħu fid-deżert kontra x-xitan. Fl-ewwel tentazzjoni, Ġesù jurina li lil Alla nagħrfuh permezz tal-Kelma tiegħu. It-tieni darba li x-xitan jittanta ’l Ġesù, Ġesù jwissih li min tassew iħobb lil Alla ma jġarrbux billi jabbuża mil-libertà li tah. Fl-aħħarnett, ix-xitan waqaf jittanta lil Ġesù meta dan urieh li hu lest li jaqdi biss lil Alla waħdu.
Imma din il-konverżjoni ma nistgħux inġibuha bl-isforzi tagħna biss. Kif jgħidilna San Pawl fit-Tieni Qari, “l-grazzja ta’ Alla u d-don mogħti bil-grazzja ta’ bniedem wieħed li hu Ġesù Kristu, xterdu bil-bosta fuq il-kotra.” Huwa permezz ta’ Ġesù biss li aħna nistgħu nduru lejn Alla u nsejħulu: “Abba, Missier.”
Matul dan l-Ewwel Ħadd tar-Randan, dawk il-katekumeni li jkunu se jitgħammdu waqt il-Vġili tal-Għid isirilhom dak li hu magħruf bħala r-Rit tal-Għażla. Dan hu rit li permezz tiegħu huma jiġu mistiedna sabiex tassew jagħżlu lil Kristu bħala s-Salvatur tagħhom u hekk jidħlu aktar fil-fond fil-misteru tal-mewt u l-qawmien ta’ Ġesù.
Jalla dan ir-Randan ikun għalina lkoll żmien ta’ konverżjoni ġenwina, ta’ grazzja u ta’ ħafna barkiet.
Talba
O Alla, Missier għażiż tagħna, inti trid iġġedded kollox fi Kristu u tiġbed il-bnedmin kollha lejh; mexxi lil dawn l-ulied tal-Knisja magħżulin biex jirċievu l-magħmudija, u agħmel li jkunu fidili għas-sejħa tagħhom, biex jinbnew fis-saltna ta’ Ibnek u jirċievu s-siġill tal-Ispirtu s-Santu skont il-wegħda tiegħek. Bi Kristu Sidna. Ammen.
The post Il-falliment tal-bniedem appeared first on Behold.
Ikkummenta