It-Tielet Ħadd tar-Randan Sena A
Kolletta
O Alla, kull ħniena u tjieba ġejja minnek; inti wrejtna illi s-sawm u t-talb u l-għoti ta’ karità lill-foqra jagħtuna l-qawwa kontra d-dnub; ħares, fit-tjieba tiegħek, lejn din l-istqarrija umli ta’ ħtijietna, biex aħna, li l-kuxjenza tagħna ttaqqalna, ikollna dejjem l-għajnuna tal-ħniena tiegħek. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Fiż-żminijiet bikrin tal-Knisja, dawk li kienu jitolbu li jissieħbu ma’ dawk li jemmnu kienu jgħaddu minn numru ta’ provi jew skrutinji. Fost l-oħrajn, dawk li kienu jagħmlu ċertu xogħlijiet, li mhux bilfors illum meqjusa bħala immorali, kienu jkunu mitluba li jieqfu qabel jiġu aċċettati bħala katekumeni. Dawk b’xorta ta’ xogħlijiet oħra kienu jiġu saħansitra pprojbiti milli jiġu kkunsidrati għall-katekumenat. Skrutinju ieħor kien isir fil-bidu tar-Randan ta’ qabel il-Vġili tal-Għid meta l-katekumeni jkunu se jitgħammdu. Issa mhux biss l-istat soċjali tagħhom kien ikun eżaminat imma wkoll il-progress li jkunu għamlu fl-ewwel passi tagħhom fil-komunità Nisranija. L-isqof kien jitlob lill-membri tal-komunità biex jgħarrfuh kif dawn il-katekumeni jkunu kibru fil-fidi u fil-qadi tal-aħwa fix-xhur jew snin li jkunu ilhom fil-katekumenat.
Għalkemm maż-żmien il-kriterji li fuqhom kienu jiġu eżaminati il-katekumeni tbiddlu, il-prinċipju li tiġi eżaminata l-fidi tagħhom baqa’. Mhux biss, imma l-Knisja trid li f’dan l-eżerċizzju, dawk magħżula sabiex jissieħbu mal-komunità Nisranija jingħaqdu magħhom dawk li huma diġà mgħammda. Għaldaqstant, dawn l-iskrutinji, li jsiru fit-Tielet, ir-Raba’ u l-Ħames Ħdud tar-Randan, huma għodda ta’ konverżjoni għalina lkoll għaliex jgħinuna nagħrfu kemm hi awtentika l-fidi tagħna, u allura nkunu nistgħu nirranġaw fejn ikun sejjer ħażin.
It-tema li tippreżentalna l-Liturġija llum hija dik ta’ Kristu bħala l-Ilma tal-Ħajja ta’ dejjem. Dan tagħmlu billi tipproponi s-silta mill-Evanġelju skont San Ġwann fejn Ġesù jiltaqa’ mal-mara Samaritana fuq il-bir ta’ Ġakobb. Fid-djalogu bejn Ġesù u l-mara Samaritana nistgħu nosservaw xhieda ta’ konverżjoni ġenwina. Il-mara, li ma nafux isimha u allura tirrapreżenta lil kulħadd, tibda biex issejjaħ lil Ġesù bħala “Lhudi” b’mod dispreġġattiv. Ftit wara ssejjaħlu “Sinjur,” imbagħad “Profeta,” u fl-aħħar bħala l-“Messija”. Li jġegħilha tgħaddi minn din il-bidla fil-ħsieb kien l-ilma li kien lest joffrilha Ġesù. Fil-bidu ħasbet li kien qed jitkellem dwar l-ilma fiżiku iżda dlonk indunat li kien qed jgħid fuq l-ilma li jaqta’ għatx wisq iktar kiefer minn dak fiżiku: l-għatx eżistenzjali ta’ min ifittex lil xi ħadd li jaċċetah kif tassew hu. Dan hu l-għatx li kollha kemm aħna nħossuh u li Ġesù kapaċi jaqtgħalna.
Matul it-talba tal-Eżorċiżmu li jagħmel l-isqof f’dan il-Ħadd, l-element tal-ilma hu preżenti ħafna. Hu jitlob sabiex, bħal mara Samaritana, dawk magħżula biex jirċievu l-magħmudija jixxennqu għall-ilma ħaj li jrid jagħtihom Ġesù. Hu jkompli jitlob ’l Alla biex “huma jagħrfu u jistqarru li huma midinbin u dgħajfa; tħallix li t-tama tagħhom tkun fiergħa u li x-xitan iqarraq bihom; eħlishom minn kull żball, biex jagħrfu l-ħażen li għamlu u ruħhom tissaffa, u bil-grazzja tiegħek jaqbdu t-triq tas-salvazzjoni.”
Talba
Mulej, agħtini mill-ilma tiegħek ħalli ma jaqbadni qatt il-għatx. Ammen.
The post Ġesù jisqina bl-Ilma tal-Ħajja ta’ Dejjem appeared first on Behold.
Ikkummenta