Għid il-Ħamsin
Kolletta
O Alla, bil-misteru tal-festa tal-lum inti tqaddes il-Knisja kollha tiegħek, f’kull ġens u poplu: sawwab id-doni tal-Ispirtu s-Santu fuq id-dinja kollha, minn tarf għall-ieħor, u agħmel li issa wkoll iseħħ, fil-qalb ta’ kull min jemmen, dak kollu li seħħ bil-grazzja tiegħek sa mill-bidu tax-xandir tal-Bxara t-tajba. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Illum il-Knisja tippreżentalna l-festa tal-għoti tal-Ispirtu s-Santu, Għid il-Ħamsin. Interessanti li l-Evanġelista San Ġwann jirrakkonta li din il-ġrajja seħħet dakinhar stess li Ġesù qam mill-imwiet, “Dakinhar filgħaxija, fl-ewwel jum tal-ġimgħa.” Fil-fatt, il-ġrajja tambjenta ruħha f’Ġerusalemm wara s-sejba tal-qabar vojt minn Marija ta’ Magdala, il-Ħadd filgħodu kmieni. Hi ħasbitu l-ġennien imma mbagħad għarfitu meta sejħilha b’isimha. Issa kien imiss lid-dixxipli li jiltaqgħu miegħu wiċċ imb wiċċ … ukoll għal għarrieda, ukoll mhux mistennija.
Għall-kuntrarju tal-Maddalena, id-dixxipli ma marrux ifittxuh huma ħdejn il-qabar. Anzi, l-Evanġelista jgħidilna li kienu mbeżżgħa, bil-bibien magħmluqa. Imma l-Mulej ifittixna u jiltaqa’ magħna proprju meta nkunu mbeżża’ … saħansitra bil-bibien magħluqa. Kemm hi sabiħa t-tislima li jtenni l-Mulej għal darba darbtejn: “Is-sliem għalikom!” Huwa jaf jagħti sliem li fih il-qalb tistrieħ. Ma jagħtiniex is-sliem li tagħti d-dinja. Għax is-sliem tad-dinja jisfaxxa fix-xejn imma s-sliem tiegħu jibqa’ għal dejjem. Ħallas għalih b’demmu stess: “kif qal hekk, urihom idejh u ġenbu.”
Imbagħad il-Mulej nefaħ fuqhom u tahom il-wens li tant kellhom bżonn fil-qtigħ ta’ qalb tagħhom: “Ħudu l-Ispirtu s-Santu.” Permezz ta’ dan id-Difensur, il-Mulej kien magħhom u magħna. Permezz ta’ dan l-Ispirtu Qaddis li jgħammar fina, il-Mulej baqa’ magħhom u magħna. Ma ħalliniex iltima.
Talba
Spirtu s-Santu, nissel fija:
l-Għerf biex nara l-ħajja bl-għajnejn ta’ Alla;
il-Fehma biex nifhem il-ġrajjiet ta’ madwari kif jifhimhom Alla;
il-Kunsill biex nagħraf it-triq li għandi nimxi;
il-Qawwa biex tweżinni fid-dgħufija tiegħi u quddiem it-tbatija;
ix-Xjenza biex napprezza il-kobor ta’ Alla u l-imħabba tiegħu għal kull ħlejqa;
il-Pjetà biex ikolli qalb ħelwa u umli bħal dik ta’ Ġesu`;
il-Biża’ ta’ Alla biex b’fiduċja nintelaq f’idejn Alla għax hu Missier twajjeb li jħobbni.
Ammen.
The post Ħudu l-Ispirtu s-Santu appeared first on Behold.
Ikkummenta