Erbgħin jum fid-deżert

L-Ewwel Ħadd tar-Randan Sena B

Kolletta

O Alla li tista’ kollox, bit-taħriġ ta’ kull sena matul ir-Randan imqaddes agħtina li nifhmu dejjem iżjed il-misteru ta’ Kristu, u li b’ħajja xierqa niksbu l-frott tiegħu. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.

Alla jeħles lil Noè mid-dulluvju u jagħmel patt miegħu.
Ġen 9:8-15

Qari mill-Ktieb tal-Ġenesi

Alla kellem lil Noè u lil uliedu miegħu u qalilhom: “Arawni, hawn jien se nagħmel il-patt tiegħi magħkom u ma’ nisilkom warajkom; ma’ kull ħliqa ħajja li hemm magħkom, mat-tjur u mal-bhejjem, ma’ kull bhima selvaġġa li hemm magħkom, u mal-bhejjem kollha li ħarġu magħkom mill-arka. Jien nagħmel il-patt tiegħi magħkom, li qatt iżjed ma jinqered, ebda laħam ħaj, bl-ilmijiet tad-dulluvju; u qatt iżjed ma jkun hemm dulluvju biex iħarbat l-art”.

U żied jgħid Alla: “Dan ikun is-sinjal tal-patt li jien qiegħed nagħmel bejni u bejnkom, u bejn kull ħliqa ħajja li hemm magħkom, għall-ġenerazzjonijiet kollha għal dejjem. Inqiegħed il-qaws tiegħi fis-sħab, u jkun sinjal tal-patt bejni u bejn l-art. Meta niġma’ s-sħab fuq l-art u tfeġġ il-qawsalla fis-sħab, jien niftakar fil-patt bejni u bejnkom u bejn kull ruħ ħajja f’kull laħam; u ma jkunx hemm iżjed l-ilma tad-dilluvju biex jeqred kull laħam ħaj”.

Il-Kelma tal-Mulej.
R/. Irroddu ħajr lil Alla

Salm 24(25):4-5ab,6-7bċ,8-9

R/. (10): Il-mogħdijiet tal-Mulej kollhom tjieba u fedeltà.

Triqatek, Mulej, għarrafni,
il-mogħdijiet tiegħek għallimni.
Mexxini fis-sewwa tiegħek u għallimni,
għax int Alla tas-salvazzjoni tiegħi. R/.

Ftakar fil-ħniena u t-tjieba tiegħek,
għax huma minn dejjem, Mulej.
Inti tajjeb, Mulej;
ftakar fija skont it-tjieba tiegħek. R/.

Tajjeb u sewwa l-Mulej;
għalhekk juri triqtu lill-ħatja.
Imexxi l-imsejkna fis-sewwa,
jgħallem lill-fqajrin it-triq tiegħu. R/.

L-ilma tal-magħmudija jsalva lilkom ukoll.
1 Piet 3:18-22

Qari mill-Ewwel Ittra ta’ San Pietru Appostlu

Għeżież, Kristu wkoll miet darba għal dejjem minħabba d-dnubiet; hu li kien ġust, miet għall-inġusti biex iressaqkom lejn Alla; kien mogħti l-mewt fil-ġisem, imma ħa l-ħajja fl-ispirtu, li bih mar ixandar is-salvazzjoni lill-erwieħ li kienu magħluqa fil-ħabs. Dawn kienu l-erwieħ ta’ dawk li darba ma ridux jisimgħu, meta Alla qagħad jistenna bis-sabar fiż-żmien li Noè kien jibni l-arka. Ftit, jiġifieri tmienja biss, salvaw bis-saħħa tal-ilma. Dan l-ilma huwa tixbiha tal-magħmudija, li issa ssalva lilkom ukoll. Mhux għax tnaddaf il-ħmieġ tal-ġisem, imma għax hi talba lil Alla ħierġa minn kuxjenza safja bis-saħħa tal-qawmien ta’ Ġesù Kristu, li tela’ s-sema u qiegħed fuq il-lemin ta’ Alla u għandu taħtu s-Setgħat u l-Qawwiet tal-anġli.

Il-Kelma tal-Mulej
R/. Irroddu ħajr lil Alla

AKKLAMAZZJONI QABEL L-EVANĠELJU
ara Mt 4:4b

Glorja u tifħir lilek, Kristu!
Il-bniedem mhux bil-ħobż biss jgħix,
iżda b’kull kelma li toħroġ minn fomm Alla.
R/. Glorja u tifħir lilek, Kristu!

Kien imġarrab mix-xitan, u l-anġli kienu jaqduh.
Mk 1:12-15

Qari mill-Evanġelju skont San Mark

F’dak iż-żmien, l-Ispirtu ħareġ lil Ġesù fid-deżert. U baqa’ fid-deżert erbgħin jum, jiġġarrab mix-Xitan. Kien jgħix mal-bhejjem selvaġġi, u kienu jaqduh l-anġli. Wara li arrestaw lil Ġwanni, Ġesù mar il-Galilija jxandar l-Evanġelju ta’ Alla u jgħid: “Iż-żmien huwa mitmum, u s-Saltna ta’ Alla waslet; indmu u emmnu fl-Evanġelju”.

Il-Kelma tal-Mulej.
R/. Tifħir lilek, Kristu.

Riflessjoni

Illum, l-Ewwel Ħadd tar-Randan, il-Knisja tippreżentalna l-episodju tat-tentazzjonijiet li Ġesù ġarrab mix-xitan fid-deżert, skont kif jirrakkuntahulna l-Evanġelista San Mark. Hija silta pjuttost qasira minn kif imdorrijin nisimgħuha fir-rakkonti ta’ San Mattew jew ta’ San Luqa. Immedjatament qabel dan l-episodju, San Mark jgħidilna li Ġesù tgħammed minn Ġwanni fil-Ġordan. Hekk kif kien tiela’ mill-ilma, is-smewwiet infetħu filwaqt li l-Ispirtu niżel fuqu. Dan l-istess Spirtu li Ġesù għadu kif irċieva, issa joħorġu fid-deżert. Bħal Elija, Ġesù jqatta’ erbgħin jum fid-deżert, “jiġġarrab mix-Xitan.” Anke l-istess Iben ta’ Alla—mimli bl-Ispirtu li għadu kif niżel fuqu fil-Magħmudija—iġarrab it-tentazzjonijiet tal-Ħażin! Kemm iktar aħna—bnedmin dgħajfa—fil-ħajja tagħna nagħmlu esperjenza tal-qawwa tax-xitan! Jekk ix-xitan ma qagħadx lura milli jġarrab lill-istess Alla, kif ser joqgħod lura milli jittanta lilna, bnedmin dgħajfa? Imma Ġesù ma ċediex għat-tentazzjonijiet tiegħu għaliex ħalla lill-Ispirtu jiggwidah. U l-istess aħna, nirbħu lill-Ħażin meta nħallu lill-Ispirtu jmexxina … meta nħallu t-tmun f’idejh … meta nċedu r-rieda tagħna biex isseħħ tiegħu.

San Mark imbagħad ikompli billi jgħidilna li dan iż-żmien li Ġesù qatta’ fid-deżert ippreparah iktar għall-bidu tal-ministeru tiegħu. Huwa mar il-Galilija u xandar l-Evanġelju ta’ Alla. Interessanti li San Mark jiġbor dan il-bidu permezz ta’ żewġ kelmiet, “indmu u emmnu.” Huma l-istess żewġ kelmiet li qalilna s-saċerdot l-Erbgħa li għadda, proprju f’Ras ir-Randan, meta poġġa l-irmied fuq rasna bħala sinjal ta’ penitenza. Jalla dan ir-Randan iservi wkoll bħala mixja ta’ penitenza fejn ftit ftit ninħallu mill-irbit u mill-inganni tax-xitan u nilbsu l-indiema (metanoia) … nilbsu din il-bidla interjuri li tbiddlilna l-perspettiva ta’ min hu tassew Ġesù. Jalla f’dan ir-Randan inħallu lill-Ispirtu jmexxina sabiex wara li nagħrfu d-dgħufijiet tagħna, nemmnu kemm tassew Ġesù iħobbna u x’wasslitu jagħmel din l-imħabba għalina.

Talba
Mulej, fil-bidu ta’ dan ir-Randan, nitolbok tibqa’ miegħi ħalli tassew inħallik tmexxini inti. Għini nagħraf minn xiex għandi bżonn nindem. Għini nammetti u nistqarr d-dgħufijiet tiegħi fis-Sagrament tal-Qrar u, fuq kollox, għini nemmen fik u fl-Evanġelju. Ammen.

The post Erbgħin jum fid-deżert appeared first on Behold.