Avviżi - 03.11.2024 - Parroċċa Ħad-Dingli

Avviżi – 03.11.2024 – Il-31 Ħadd ta’ matul is-Sena

Illum 03/11:
- Minn fuq iz-zuntier għandna għall-bejgħ ħelu tradizzjonali Malti.
- Fl-4.00pm – Pellegrinaġġ mill-Knisja saċ-Ċimiterju; u
- Fl-4.30pm tiġi ċċelebrata quddiesa fiċ-Ċimiterju li fiha jsir it-tberik tal-oqbra u talb għal ħutna l-mejtin.
Il-Ħamis 07/11:
- Fis-7.00pm ikollna mument ta’ adorazzjoni quddiem Ġesu’ sagramentat fil-Knisja.
Il-Ġimgħa 08/11:
- Fis-6.30pm – Quddiesa u wara attività għall-irġiel fl-okkażjoni tal-festa ta’ San Martin: Ikla għand Taċ-Ċanti f’Ħaż-Żebbuġ. Booking mis-sagristija jew kif spjegat fuq il-paġna ta’ facebook tal-parroċċa sa nhar l-Erbgħa 06/11. Trasport jitlaq fis-7.15pm. Inħeġġu lill-irġiel jattendu u jistiednu ħbieb tagħhom ukoll.
L-Erbgħa 13/11:
- Il-Grupp tan-Nisa Magnificat ser jorganizza ħarga għall-Bażilika Rotunda tal-Mosta, ix-xelter ta’ ħdejn il-Knisja u jkollna ċans ukoll nieħdu xi ħaġa flimkien. Tluq fid-8.45am. u lura Ħad-Dingli fis-1.00 p.m. Kitba għand il-membri tal-kumitat tal-grupp.
Is-Sibt 16/11:
- Fil-5.15pm se jkollna Afternoon Tea u Tombla fiċ-Ċentru Parrokkjali. Kitba fis-sagristija jew kif indikat fil-paġna ta’ facebook “Festa Santa Marija – Ħad-Dingli”.
Avviżi oħra:
- Beda jintlaqa’ il-booking tal-intenzjonijiet tal-Quddies għas-sena 2025 b’suffraġju għall-familjari, qraba, u ħbieb mejtin. Min jixtieq jagħmel dan mitlub jiġbor formola minn fuq il-mejda tal-offerti. Il-formoli tistgħu teħduhom id-dar, iġġibuhom magħkom il-Knisja mimlija u tħalluhom f’envelope magħluq fil-kaxxa li hemm fuq il-mejda tal-offerti. Kollox hemm spjegat fil-formoli. Min ikollu xi diffikulta’ jista’ jkellem lill-Arċipriet.
- Bħal dan iż-żmien sena jitfakkar il-75 anniversarju tad-Domma tal-Assunta, li hi l-ġrajja tal-1 ta Novembru 1950 meta l-Papa Piju XII iddikjara bħala Domma ta’ Fidi li l-Madonna, wara li temmet ħajjitha fuq l-art, ġiet imtellgħa fis-sema bir-ruħ u l-ġisem. Għal dan l-anniversarju, il-parroċċa beħsiebha torganizza diversi inizjattivi, bl-ewwel waħda hi kompetizzjoni għad-disinn ta’ logo uffiċjali li jfakkar dan l-anniversarju biex jintuża matul is-sena d-dieħla. Dawk interessati jieħdu seħem jistgħu jiġbru karta bl-informazzjoni kollha mis-sagristija jew mill-Uffiċċju Parrokkjali. Id-disinni proposti se jintlaqgħu sal-15 ta’ Diċembru u d-disinn rebbieħ jitħabbar fl-aħħar ta’ din is-sena, f’jum l-anniversarju tat-twaqqif tal-parroċċa tagħna.
- Xtaqna ninfurmawkom ukoll li tajna bidu għall-konservazzjoni u r-restawr tal-fjuri tal-ganutell li jintramaw mal-istatwa titulari ta’ Santa Marija. Minn dawn għandna 4 bukketti ta’ fjuretti fil-kantunieri tal-bradella u girlandna dawramejt ma’ fuq tal-qabar, f’riġlejn il-Madonna. Dan hu xogħol rikk ħafna li jidher kienu nħadmu mis-Sorijiet tal-klawsura ta’ Sant’Ursola fil-Belt Valletta. Ix-xogħol diġa’ nbeda u qed isir mis-Sur Joshua Mercieca, minn Ħal Tarxien, li jispeċjalizza f’dan ix-xogħol tal-ganutell. Se jkun meħtieġ ukoll jinħadem armarju biex jintrefgħu aħjar. Min jixtieq jgħin finanzjarjament jista’ javviċina lill-Arċipriet.
- B’rabta mal-Milied li ġej qed nagħmlu stedina lit-tfal ħalli jingħaqdu mal-Kor tat-Tfal Joy of the Gospel biex fil-Velja tal-Lejl tal-Milied li ssir hawn il-knisja ikantaw għanjiet tal-Milied. Għaldaqstant inħeġġeġ lill-ġenituri li għandhom ulied ta’ bejn is-7 u l-14-il sena biex jinkitbu fis-Sagristija mill-aktar fis ħalli nibdew il-preparazzjoni. Aktar dettalji jingħataw ’il quddiem.
Matul din il-ġimgħa daħlu:
- € 375.86 bħala donazzjonijiet għal Dar Fra Diegu mill-attivita’ tal-Kummissjoni Tfal Dingli fl-1/11; u
- € 185 bħala donazzjonijiet b’risq il-proġetti tal-manutenzjoni tal-knisja. Grazzi.
Nitolbu għal ruħ Michelina Farrugia li għaddiet għal ħajja ta’ dejjem. Agħtiha, o Mulej, il-mistrieħ ta’ dejjem . . .