Avviżi - 24.11.2024 - Parroċċa Ħad-Dingli

Avviżi – 24.11.2024 – L-34 Ħadd ta’ matul is-Sena

Solennità ta’ Kristu Re’, Sultan tal-Ħolqien Kollu

Illum 24/11:
- Fil-5.00pm – Ċelebrazzjoni Djoċesana mmexxija minn Monsinjur Arċisqof Charles Scicluna bit-talba tal-għasar u l-Barka Sagramentali fil-Bażilika Minuri ta’ Kristu Re’, f’Raħal Ġdid.
L-Erbgħa 27/11:
- Il-Grupp tan-Nisa ‘Magnificat’ se jorganizza nofs ta’ nhar irtir bi tħejjija għall-Avvent. Imexxi Mons. Anton Gouder. L-irtir ser isir fid-Dar tal-Kleru, Birkirkara, u hu miftuħ għal kulħadd. Inħeġġu għal attendenza sabiħa, anke għax ser issir żjara lil diversi saċerdoti residenti hemmhekk. Tluq fit-8.45am minn ħdejn l-għassa u lura Ħad-Dingli fis-1.00pm. Min hu mħajjar jattendi javża lill-membri tal-kumitat tal-grupp.
Il-Ħamis 27/11:
- Fis-7.00pm – Mument ta’ adorazzjoni quddiem Ġesu’ sagramentat.
Is-Sibt 30/11:
- Fl-4.30pm – quddiesa bis-sagrament taż-żwieġ; u
- Fil-quddiesa tas-6.30pm isir it-tberik tal-girlanda tal-Avvent.
Il-Ħadd 01/12, l-ewwel Ħadd tal-Avvent u nagħtu bidu għal Sena liturġika Ġdida li ser tkun is-Sena Ċ
- Fid-9.30am – Quddiesa speċjali li fiha nistiednu lill-familji bi tfal u adoloxxenti.
- Fuq iz-zuntier ser ikollna bejgħ ta’ ħelu u biljetti bħala lotterija b’risq il-parroċċa.
- Fit-3.00pm, il-Fondazzjoni Life Network qed tistieden lil kulħadd biex ikun vuċi li tiddefendi t-tarbija fil-ġuf bis-sehem f’Marċ għall-Ħajja fil-Belt.
Avviżi oħra:
- Għal żmien il-Milied ser ikollna:
  - Wirja ta’ Presepji u Bambini fil-Kappella ta’ Santa Marija Maddalena. Min jixtieq jesebixxi xi presepju jew bambin hu mistieden jiġbor formula ta’ parteċipazzjoni minn fuq il-mejda tal-offerti li fiha aktar dettalji dwar din il-wirja, u wara li jimlieha jgħaddihielna lura fl-iqsar żmien biex isiru l-preparamenti meħtieġa.
  - Għal-Lejl tal-Milied, apparti s-sehem tal-kor tat-tfal b’għanjiet tal-Milied se tittella’ wkoll play fil-knisja bis-sehem tat-tfal. Għalhekk, dawk it-tfal ta’ bejn is-7 u l-14-il sena li jixtiequ jieħdu sehem fil-play tal-Lejl tal-Milied li ssir hawn il-knisja huma mitluba jinkitbu fis-sagristija mill-aktar fis. Aktar dettalji jingħataw ’il quddiem.
- Fl-aħħar jiem, fil-Knisja kompla x-xogħol ta’ kisi u tħejjija għad-dawl taż-żewġ niċeċ li qed isiru fil-kappelluni, u diversi xogħlijiet fis-sagristija l-prinċipali bħala parti minn proġett ta’ titjib u tisbiħ. Qed tissokta wkoll il-manutenzjoni tal-bibien ta’ barra mill-ħaddiema tad-Dipartiment tax-Xogħlijiet Pubbliċi li lestew dawk tal-ġnub u bdew il-bibien tal-faċċata. Aktar dettalji jingħataw mal-andament tax-xogħol. Nifhmu li dawn ix-xogħlijiet jistgħu jikkawżaw xi inkonvenjent li qed nagħmlu ħilitna biex ikun l-anqas possibbli, imma tapprezzaw li dan kollu qed isir għall-aħjar tal-knisja tagħna. Nirringrazzjaw lil kull min qiegħed jagħtu sehemu u lil kulħadd għall-koperazzjoni.
Matul din il-ġimgħa daħlu:
- € 410 fil-ġabra għall-Fond tal-Iskejjel tal-Knisja; u
- € 45 bħala donazzjonijiet b’risq il-manutenzjoni tal-knisja, u għar-restawr tal-ganutell tal-istatwa ta’ Santa Marija. Grazzi.
Nitolbu għal ruħ Ġan Patist Camilleri li għadda għal ħajja ta’ dejjem. Agħtih, o Mulej, il-mistrieħ ta’ dejjem . . .