Intom min tgħidu li jien?

Solennità ta’ San Pietru u San Pawl, Appostli

Kolletta

Nitolbu. O Alla, int timliena b’ferħ qaddis f’dan il-jum ta’ festa solenni f’ġieħ l-Appostli San Pietru u San Pawl; agħmel li l-Knisja tiegħek timxi dejjem fuq it-twissijiet tagħhom kif bihom in qegħedt fiha s-sisien tar-reliġjon. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen.

Issa naf tassew li l-Mulej jeħlisni minn id Erodi.
Atti 12:1-11

Qari mill-Ktieb tal-Atti tal-Appostli

Għall-ħabta ta’ dak iż-żmien, is-sultan Erodi qatagħha li jaħbat għal xi wħud minn ħdan il-Knisja. Qatel ’il Ġakbu, ħu Ġwanni, bis-sejf. Imbagħad, billi ra li din il-ħaġa għoġbot lil-Lhud, qatagħha li jaqbad ’il Pietru wkoll. Dan kien f’jiem l-Ażżmi. Meta arrestah u tefgħu l-ħabs, qiegħed għassa miegħu erba’ għaqdiet ta’ suldati ta’ erbgħa kull waħda, bil-ħsieb li, wara l-Għid, iressqu quddiem il-poplu.

Pietru, mela, kien arrestat fil-ħabs, bil-għassa miegħu. Fl-istess ħin, il-Knisja kienet qiegħda titlob ’l Alla għalih bil-ħeġġa. Fil-lejl stess ta’ qabel ma Erodi kellu joħroġ ’il Pietru, dan kien rieqed bejn żewġ suldati, marbut b’żewġ ktajjen, waqt li xi għassiesa kienu għassa mal-bieb tal-ħabs. F’daqqa waħda ġie hemm anġlu tal-Mulej, u dawl idda mal-kamra. L-anġlu ta lil Pietru daqqa fuq ġenbu, qajmu u qallu: “Qum malajr.” Il-ktajjen waqgħu minn ma’ idejh. Imbagħad l-anġlu qallu: “Dawwar il-mantar miegħek u imxi warajja.” Pietru ħareġ u mexa warajh, bla ma ntebah li dak li kien qiegħed jiġri permezz tal-anġlu kien tassew; ħaseb li kienet xi ħolma.

Għaddew l-ewwel għassa, u t-tieni waħda wkoll, u waslu ħdejn il-bieb tal-ħadid li kien jagħti għall-belt; u dan infetah waħdu. Ħarġu, u mxew tul it-triq. F’daqqa waħda l-anġlu telaq minn ħdejh. Imbagħad Pietru ġie f’tiegħu, u qal: “Issa qiegħed ninduna, tabilħaqq, li l-Mulej bagħat l-anġlu tiegħu u ħelisni minn id Erodi u minn dak kollu li l-Lhud kienu qegħdin jistennew li jsir.”

Il-Kelma tal-Mulej.
R/. Irroddu ħajr lil Alla

Salm 33, 2-9

R/. Dawk li jibżgħu mill-Mulej, l-anġlu tiegħu jeħlishom!

Kull ħin inbierek ’il-Mulej,
tifħiru dejjem f’fommi.
Bil-Mulej tiftaħar ruħi,
jisimgħu l-fqajrin u jifirħu! R/.

Kabbru ’l-Mulej miegħi,
u ngħollu ismu flimkien.
Jien fittixt il-Mulej, u weġibni,
u minn kull biża’ ħelisni. R/.

Ħarsu lejh u tiddu bil-ferħ,
u wiċċkom ma jistħix.
Dan il-fqajjar sejjaħ il-Mulej, u semgħu,
u mid-dwejjaq kollha tiegħu ħelsu. R/.

L-anġlu tal-Mulej jgħammar madwar dawk li jibżgħu minnu, u jeħlishom. Duqu u taraw kemm hu tajjeb il-Mulej,
hieni l-bniedem li jistkenn fih. R/.

Hemm merfugħa għalija l-kuruna tal-ġustizzja.
2 Tim 4:6-8. 17-18

Qari mit-Tieni Ittra ta’ San Pawl Appostlu lil Timotju

Għażiż: Jiena ngħid għalija, demmi ġa mxerred b’sagrifiċċju, u żmien it-tluq tiegħi wasal. Tqabadt it-taqbida t-tajba, temmejt il-ġirja, ħarist il-fidi.

Mill-bqija hemm merfugħa għalija l-kuruna tal-ġustizzja, li biha f’dak il-jum iħallasni l-Mulej, l-Imħallef ġust, u mhux lili biss, imma wkoll lil dawk kollha li jkunu għexu bix-xewqa tad-dehra tiegħu. Il-Mulej waqaf miegħi u tani l-qawwa biex, bis-saħħa tiegħi, il-kelma tixxandar sal-aħħar u l-ġnus kollha jisimgħuha. Hekk jien inħlist minn ħalq l-iljun. Il-Mulej jeħlisni minn kull deni u jħarisni sa ma nasal fis-saltna tiegħu tas-sema. Glorja lilu għal dejjem ta’ dejjem. Ammen.

Il-Kelma tal-Mulej
R/. Irroddu ħajr lil Alla

AKKLAMAZZJONI QABEL L-EVANĠELJU
MT 16:18

Hallelujah. Hallelujah.
Inti Pietru, u fuq din il-ġebla jiena nibni l-Knisja tiegħi,
u l-bibien tal-infern ma jegħlbuhiex.
Hallelujah.

Inti Pietru: jiena nagħtik l-imfietaħ tas-Saltna tas-smewwiet.
Mt 16:13-19

Qari mill-Evanġelju skont San Mattew

F’dak iż-żmien: Meta wasal fl-inħawi ta’ Ċesarija ta’ Filippu, Ġesù staqsa lid-dixxipli tiegħu u qalilhom: “In-nies min jgħidu li hu Bin il-bniedem?” U huma weġbuh: “Xi wħud Ġwanni l-Battista, oħrajn Elija, u oħrajn Ġeremija jew wieħed mill-profeti.” “Imma intom,” qalilhom, “intom min tgħidu li jien?” U qabeż Xmun Pietru u qallu: “Inti l-Messija, l-Iben ta’ Alla ħaj.” U wieġbu Ġesù u qallu: “Imbierek int, Xmun, bin Ġona, għax mhux il-laħam u d-demm urewk min jien, imma Missieri li hu fis-smewwiet. U min-naħa tiegħi ngħidlek: Inti Pietru, u fuq din il-ġebla jiena nibni l-Knisja tiegħi, u l-bibien tal-infern ma jegħlbuhiex. Lilek nagħtik l-imfietah tas-Saltna tas-Smewwiet, u kulma torbot fuq l-art ikun marbut fis-smewwiet, u kulma tħoll fuq l-art ikun maħlul fis-smewwiet.

Il-Kelma tal-Mulej.
R/. Tifħir lilek, Kristu.

Riflessjoni

Ir-rakkont tal-primat ta’ Pietru bħal donnu jieħu tifsira iktar qawwija hekk kif ilkoll kemm aħna għadna kif assisstejna għall-għażla ta’ papa ġdid—Papa Ljun XIVIs-silta hija ambjentata fl-inħawi ta’ Ċesarija ta’ Filippu fejn Ġesù jagħmel żewġ mistoqsijiet lid-dixxipli tiegħu:
– “Min jgħidu n-nies li hu Bin il-Bniedem?”
– “Imma intom min tgħidu li jien?”

Kieku Ġesù kellu jistaqsini l-istess żewġ mistoqsijiet u kieku kelli nittraduċihom għal-lingwaġġ tal-lum, kieku naħseb li nittraduċihom b’dan il-mod:
– “X’taf fuqi, x’qalulek l-oħrajn fuqi?
– “Imma jien, min jien għalik?”

L-ewwel mistoqsija tindirizza lil moħħi; it-tieni tipponta lejn qalbi. Biex inwieġeb l-ewwel mistoqsija nista’ noħroġlu ċ-ċertifikati kollha li għandi, it-teoloġija u l-filosofija kollha li studjajt … iżda dawn xejn ma jgħoddu bħala tweġiba għat-tieni mistoqsija. Pietru, sajjied li l-Mulej sejjaħlu minn ma’ xatt il-baħar, għaraf iwieġeb it-tieni mistoqsija mhux minħabba xi għerf li kiseb, imma għax għamel l-esperjenza ta’ Ġesù … iltaqa’ miegħu b’mod personali … ġarrbu f’ħajtu. U din il-ħaġa Ġesù stess jikkonfermaha: “mhux bniedem tad-demm u l-laħam uriek dan, imma Missieri li hu fis-smewwiet.” It-tweġiba ta’ Pietru għandha l-għeruq tagħha msenslin f’esperjenza divina. U, propju minħabba dawn l-għeruq fil-fond, li l-intimità bejn “Bin Alla l-Ħaj” u “bin Ġona” tittrasforma lil Xmun f’Pietru. Baqa’ bil-karattru żbukkat tiegħu, baqa’ spontanju u jistaqsi fejn ma jifhimx … imma fuq din il-blata l-Mulej għoġbu jibni l-Knisja tiegħu. Lilu l-Mulej għoġbu jafdalu missjoni ġdida. Xorta ħallih sajjied … imma issa tah sajda differenti: dik tal-bnedmin.

L-stess ġara ftit iktar minn xahar ilu fil-Kappella Sistina. U l-istess għadu jiġri lili u lilek kull darba li nazzardaw nitilqu t-tmun f’idejh, kull wieħed skont is-sajda tiegħu.

Talba

Missier, in-nies jgħidu ħafna xorti fuqek … kemm affarijiet sbieħ u kemm koroh. Jgħidu li int ħlaqt kollox, li inti twajjeb. Oħrajn jgħidu li inti trux u inġust.

U xi drabi naqbel magħhom ukoll.

Imma fil-fond ta’ qalbi naf li, fittixt kemm fittixt, bħalek ma sibtx. Il-ferħ tiegħek ma jitqabbel ma’ xejn. Inti Dak li tagħti sens lil ħajti, anke meta ma naqbilx miegħek, anke meta ma nifhmekx, anke meta nħossok titlob minni affarijiet tqal. Ġarrabtek … u għalhekk inti Dak li ma ħallejtnix iktar Xmun. Biddiltni f’Pietru.

Ibqa’ miegħi għax jiena fraġli u niżbalja. Is-sajda f’idejk. Jiena biss se nkala x-xbiek. Ammen.

The post Intom min tgħidu li jien? appeared first on Behold.