Avviżi – 17.08.2025 – Jum il-Festa Titulari ta’ Santa Marija
- L-Arċipriet flimkien mal-Kleru, il-Komunita’ Salesjana, il-Kunsill Pastorali Parrokkjali u l-Kumitat Festa Esterna jawguraw lil kulħadd il-FESTA T-TAJBA. Ippermettuli ħsiebi jmur ukoll llum f’dawk li għandhom xi familjari morda kemm fid-djar u fl-isptarijiet, u fl-emigranti. Wasslu t-tislijiet tiegħi lil dawn ħutna kollha u lill-familjari tagħhom.
- Il-quddiesa ewlenija ta’ jum il-festa tibda fid-9.15am u se titmexxa mill-Kardinal Mario Grech. Inħeġġiġkom nagħmlu ħilitna u nattendu għal din il-quddiesa. Tajjeb li kulħadd ikun fil-knisja fid-9.00 biex nagħtu merħba lill-Kardinal Grech. Il-quddiesa ta’ wara, li soltu tkun fil-11.00, tibda fil-11.15.
- Filgħaxija, il-purċissjoni bl-istatwa ta’ Santa Marija toħroġ fis-7.00 p.m. Għall-ħabta tal-10.00 p.m. imbagħad nerġgħu niltaqgħu quddiem il-knisja għad-dħul tal-purċissjoni u l-kant tal-Innu l-Kbir. Wara, nkunu flimkien fil-Knisja biex nirċievu l-Barka Sagramentali.
- Infakkrukom fl-importanza li l-Ħadd filgħaxija ma nipparkjawx vetturi fit-toroq li minnhom tgħaddi l-purċissjoni bl-istatwa ta’ Santa Marija. Napprezzaw twasslu dan l-appell ukoll lill-qraba tagħkom.
- B’servizz għal dawk li ma jistgħux joħorġu mid-dar, jinsabu rikoverati fl-isptar jew f’xi residenza, jew jgħixu barra minn Malta u jixtiequ jsegwu l-mumenti ewlenin tal-festa, ninfurmawkom li l-quddiesa tad-9.15am se tixxandar dirett fuq il-paġna ta’ facebook “Parroċċa Ħad-Dingli” u fuq l-istazzjon UTV. Filgħaxija wkoll, dan l-istazzjon ser ixandar dirett mumenti mill-festa tagħna.
- Il-quddiesa tat-Tnejn, l-għada tal-festa, fis-6.00 a.m. ma ssirx
- Mit-tmiem tal-festa l-Ħadd filgħaxija stess, ikollna bżonn ħafna għajnuna fiż-żarmar fuq barra. It-Tlieta mill-11am ‘il quddiem u l-Erbgħa mit-8.00am ‘il quddiem, fil-Knisja ser isir it-tiwi tad-drapp u d-damask. Napprezzaw ħafna dik id-daqqa t’id li tistgħu toffru. Tiddejqux tavviċinawna.
- Infakkru lil min għadu ma tax is-sehem tiegħu għall-festa ta’ ġewwa biex ma joqgħodx lura. Jista’ jħalli l-envelope fil-Knisja waqt il-ġbir jew fil-kaxxa fuq il-mejda tal-offerti.
- Il-Ħadd li ġej, 24/08 aħna mistiedna nattendu għall-festa ta’ Santa Marija fl-Imġarr fejn l-Arċipriet tagħna ser imexxi l-quddiesa ta’ filgħaxija u l-purċissjoni. Il-parroċċa se tipprovdi trasport, b’dawk imħajra jattendu għandhom jinkitbu fis-sagristija sal-Ġimgħa.
- Fl-aħħar jiem:
- Aktar minn 20 persuna resqu biex jagħtu d-demm f’inizjattiva li ħadna l-Ħadd li għadda;
- 21 hamper tqassmu lill-persuni fil-bżonn permezz tal-oġġetti li ġibtu l-knisja;
- € 1,250 nġabru fi tmiem il-ġimgħa li għaddiet għal Caritas Malta bħala l-ġabra ta’ karita’ fi żmien il-festa;
- € 900 oħra nġabru għall-istess għan waqt il-pellegrinaġġ bil-muturi mill-Imġarr għal Ħad-Dingli; u
- daħlu €120 f’donazzjonijiet għax-xogħlijiet fil-Knisja. Nirringrazzja lil kulħadd.
Ikkummenta