Magħmudija tal-Mulej, Sena A
Kolletta
O Alla, inti llum b’kewkba mexxejt il-ġnus u għarraftilhom lil Ibnek il-waħdieni; fil-ħniena tiegħek agħtina li aħna, li diġà għarafniek bis-saħħa tal-fidi, naslu biex nitgħaxxqu bik wiċċ imb wiċċ fis-sebħ tal-kobor tiegħek fis-sema. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Ġwanni ma ħalliehx … Ġwanni ħallieh jitgħammed
Dan Ġwanni kien profeta, kellu fih sens qawwi ta’ xi jrid Alla, kellu l-ħila jara fil-fond tal-qalb u tas-sitwazzjoni u jitkellem ċar fuq hekk skont ma kien iħoss li Alla qed jurih. Mela ra lil Ġesù. Intebaħ min hu skont il-pjan ta’ Alla, li kien il-magħżul, il-maħtur, il-Messija, u ħaseb li għalhekk m’għandux jitqies midneb bħall-oħrajn u lil Ġesù ma riedx iħallih jitgħammed. Imma b’dak li jgħidlu Ġesù jibdel il-mod kif kien qed jara din il-ġrajja tal-magħmudija ta’ Ġesù. Dan ifisser li aċċetta lil Ġesù bħala Sidu, bħala akbar minnu quddiem Alla, li jista’ jitkellem b’awtorità f’ħajtu u ħallieh jitgħammed.
Hemm xi ħadd f’ħajtek li jkellmek b’awtorità f’isem Alla fuq ħajtek, fuq l-imġiba tiegħek?
Ġesù, wara li tgħammed, minnufih tala’ mill-ilma; u ara, is-smewwiet infetħu, u ra l-Ispirtu ta’ Alla nieżel qisu ħamiema u ġej għal fuqu.
Bħala bniedem, għal tletin sena, Ġesù għex bħal kull Lhudi ieħor, segwa t-tradizzjonijiet reliġjużi kollha, tgħallem jaqra t-Torah, il-Liġi ta’ Alla u obda l-Kmandamenti. Għex f’Nazaret ma’ ommu Marija u missieru Ġużeppi u tgħallem is-sengħa ta’ mastrudaxxa. Kollox ordinarju. Mar għand Ġwanni biex jitgħammed bħal mijiet ta’ Lhud oħra. U hawn jispiċċa l-ordinarju. Għax il-meravilji li kienu tħabbru mill-profeti bdew iseħħu fih, il-Messija ta’ Alla l-ħaj, il-Qaddej ta’ Jaħweh. Dan ġara malli l-Ispirtu ta’ Alla niżel fuqu, jiġifieri għammdu, dilku, imlih. Xejn ma baqa’ l-istess. Minn hawn Ġesù beda jwettaq is-salvazzjoni tal-bnedmin.
U mis-smewwiet instama’ leħen jgħid: “Dan hu Ibni l-għażiż: fih sibt l-għaxqa tiegħi.”
Il-Missier jiddikjara pubblikament li dar-raġel minn Nazaret hu IBNU l-għażiż, l-għaxqa tiegħu. Għal min jemmen f’Alla, dikjarazzjoni bħal din għandha tqanqlu biex hu wkoll jagħmel dikjarazzjoni pubblika, “Dan hu l-Mulej u s-Salvatur tiegħi: fih sibt l-għaxqa tiegħi”.
Tagħraf li int bħala dixxiplu ta’ Ġesù għandek mandat biex ixxandar min hu Sidek bi kliemek, b’għemilek u b’ħajtek? Turi f’ħajtek li dan Ġesù hu l-Messija, il-Mibgħut ta’ Alla?
Talba
Missier qaddis, għax aħna maħluqin xbieha ta’ Ibnek u mifdijin minnu, inti wkoll titgħaxxaq bina bħala wliedek. Qaddes il-ħajja ordinarja tagħna sabiex inħalluk tqaddisna permezz tagħha, u nħalluk twettaq ir-rieda tiegħek permezz tagħna.
Ammen
The post Dan hu Ibni l-għażiż appeared first on Behold.
Ikkummenta