Aħna niġu u ngħammru għandu

Is-Sitt Ħadd tal-Għid – Sena Ċ

Kolletta

O Alla li tista’ kollox, agħmel li niċċelebraw b’ħerqa kbira dawn il-ġranet ta’ ferħ li fihom qegħdin nagħtu ġieħ lill-Mulej li qam mill-imwiet, u agħtina li l-istess għemil tagħna jkun xhieda tal-ġrajja li qegħdin infakkru. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Amen

Lill-Ispirtu s-Santu u lilna dehrilna li aħna ma għandna ngħabbukom b’ebda piż ieħor aktar minn dak li hu meħtieġ
Atti 15:1-2,22-29

Qari mill-Ktieb tal-Atti tal-Appostli

F’dak iż-żmien, niżlu xi wħud mil-Lhudija u bdew jgħallmu lill-aħwa: “Jekk ma toqogħdux għaċ-ċirkonċiżjoni skont id-drawwa li ġejja minn Mosè, ma tistgħux issalvaw”. Pawlu u Barnaba qamu kontra tagħhom u ħaduha magħhom bis-sħiħ; għalhekk qatgħuha li Pawlu u Barnaba u xi wħud oħra minnhom jitilgħu Ġerusalemm ikellmu lill-appostli u l-presbiteri fuq din il-kwistjoni.

Imbagħad l-appostli u l-presbiteri, flimkien mal-Knisja kollha, dehrilhom li kellhom jagħżlu lil xi wħud minnhom u jibagħtuhom Antjokja ma’ Pawlu u Barnaba. Dawn kienu Ġuda, jgħidulu Barsaba, u Sila, li kienu minn ta’ quddiem fost l-aħwa.

U bagħtu magħhom din l-ittra: “L-appostli u l-presbiteri, ħutkom, lill-aħwa ta’ Antjokja, tas-Sirja u taċ-Ċiliċja, li ġew mill-ġnus; is-sliem għalikom! Aħna smajna li xi wħud min-nies tagħna, mingħajr ebda ordni tagħna, ġew ħawdukom u qallbulkom moħħkom bi kliemhom. Għalhekk aħna qbilna lkoll bejnietna u dehrilna li kellna nagħżlu lil xi wħud u nibagħtuhom għandkom flimkien mal-għeżież tagħna Barnaba u Pawlu, nies li ddedikaw ħajjithom għall-isem ta’ Sidna Ġesù Kristu. Għalhekk bgħatnielkom lil Ġuda u ’l Sila, biex jgħidulkom bi kliemhom l-istess ħaġa. Għax lill-Ispirtu s-Santu u lilna dehrilna li aħna ma għandna ngħabbukom b’ebda piż ieħor aktar minn dak li hu meħtieġ, jiġifieri, li titbiegħdu mill-ikel issagrifikat lill-idoli, mid-demm, mil-laħam tal-annimali fgati u miż-żwieġ ħażin. Tagħmlu tajjeb jekk tħarsu rwieħkom minn dawn. Saħħa!”.

Il-Kelma tal-Mulej.
R/. Irroddu ħajr lil Alla

Salm 144(145):8-9,10-11,12-13ab

R/.(ara 3b): Fost il-ġnus Alla wera s-salvazzjoni tiegħu.
jew
R/. Hallelujah, hallelujah, hallelujah.

Iħenn għalina Alla, u jberikna;
idawwar għal fuqna d-dija ta’ wiċċu!
Biex jingħarfu fuq l-art triqatek,
fost il-ġnus kollha s-salvazzjoni tiegħek. R/.

Jithennew il-ġnus u jgħannu bil-ferħ,
għax trieġi l-popli bis-sewwa,
u l-ġnus fuq l-art inti tmexxihom. R/.

Ifaħħruk il-popli, o Alla,
ifaħħruk il-popli kollha.
Iberikna Alla, u tibża’ minnu
l-art kollha minn tarf għall-ieħor! R/.

L-anġlu wrieni l-Belt il-Qaddisa nieżla mis-sema.
Apok 21:10-14,22-23

Qari mill-Ktieb tal-Apokalissi ta’ San Ġwann Appostlu

L-anġlu ħadni fl-ispirtu fuq muntanja kbira u għolja, u wrieni l-Belt il-Qaddisa, Ġerusalemm, nieżla mis-sema mingħand Alla, bil-glorja ta’ Alla fiha, tiddi bħal ħaġra mill-aktar prezzjuża, bħal ġaspru jleqq daqs il-kristall.

Għandha ħajt kbir u għoli, bi tnax-il bieb fih, u tnax-il anġlu fil-bibien li fuqhom hemm miktuba ismijiet, l-ismijiet tat-tnax-il tribù ta’ wlied Iżrael. Tlieta minn dawn il-bibien jagħtu għan-naħa tal-Lvant, tlieta għan-naħa tat-Tramuntana, tlieta għan-naħa tan-Nofsinhar, u tlieta għan-naħa tal-Punent. U l-ħajt tal-Belt għandu tnax-il pedament, li fuqhom hemm it-tnax-il isem tat-tnax-il appostlu tal-Ħaruf.

Ebda tempju ma rajt fiha,
għax il-Mulej hu t-tempju tagħha,
Alla li jista’ kollox, u l-Ħaruf.
U l-Belt ma teħtieġ la xemx u lanqas qamar biex idawluha,
għax biex iddawwalha għandha l-glorja ta’ Alla,
u l-musbieħ tagħha l-Ħaruf.

Il-Kelma tal-Mulej
R/. Irroddu ħajr lil Alla

AKKLAMAZZJONI QABEL L-EVANĠELJU
ara Ġw 14:23

Hallelujah. R/. Hallelujah.
Jekk xi ħadd iħobbni, iħares kelmti, jgħid il-Mulej;
u Missieri jħobbu, u aħna niġu għandu.
R/. Hallelujah.

L-Ispirtu s-Santu jfakkarkom dak kollu li għedtilkom.
Ġw 14:23-29

Qari mill-Evanġelju skont San Ġwann

F’dak iż-żmien, Ġesù qal lid-dixxipli tiegħu: “Jekk xi ħadd iħobbni, iħares kelmti, u Missieri jħobbu, u aħna niġu u ngħammru għandu. Min ma jħobbnix ma jħarisx kliemi. U l-kelma li qegħdin tisimgħu mhijiex tiegħi, imma tal-Missier li bagħatni.

Għedtilkom dan meta għadni magħkom. Imma d-Difensur, l-Ispirtu s-Santu, li l-Missier jibgħat f’ismi, jgħallimkom kollox u jfakkarkom dak kollu li għedtilkom. Jiena nħallilkom is-sliem; nagħtikom is-sliem tiegħi; ma nagħtihulkomx kif tagħtih id-dinja. Tħallux qalbkom titħawwad u anqas titbeżża’. Smajtu x’għedtilkom: ‘Jiena sejjer u nerġa’ niġi għandkom’. Kieku kontu tħobbuni, kontu tifirħu li sejjer għand il-Missier, għax il-Missier hu akbar minni. U għedtilkom dan minn issa qabel ma jseħħ, biex meta jseħħ temmnu”.

Il-Kelma tal-Mulej.
R/. Tifħir lilek, Kristu.

Meta s-solennità ta’ Tlugħ il-Mulej fis-Sema tiġi ċċelebrata nhar il-Ħadd li ġej, illum jistgħu jinqraw it-tieni qari u l-Evanġelju tas-seba’ Ħadd tal-Għid.

Riflessjoni

F’dan is-Sitt Ħadd tal-Għid ser nisimgħu silta li tagħtina ċ-ċavetta ta’ kif għandha tkun il-ħajja ta’ min irid ikun dixxiplu veru ta’ Ġesù, u wkoll l-aħbar tar-rigal imwiegħed lilna minn Ġesù nnifsu—ir-rigal tal-Ispirtu s-Santu li permezz tiegħu m’aħna ser inkunu qatt waħedna. Huwa messaġġ tal-ferħ tal-qawmien u ta’ kuraġġ fl-għaqda fit-Trinità Qaddisa.

F’din is-silta mid-diskors tal-aħħar, Ġesù jitkellem fuq l-imħabba tad-dixxiplu lejh bħala kundizzjoni biex ikollu sehem mill-għaqda ma’ Alla—mal-Missier, miegħu u mal-Ispirtu s-Santu. Fid-dawl tal-qawmien għal darb’oħra jtambar li l-imħabba hija li tgħodd. Fil-fatt, l-Evanġelju huwa storja ta’ mħabba: storja fejn, jekk nilqgħu l-“Kelma” tal-Mulej, inkun maħbub minn Alla. Infatti Ġesù jgħid: “aħna [it-Trinità Qaddisa] niġu u ngħammru għandu,” u hekk jinħoloq spazju ta’ relazzjoni fejn jgħammar is-Sinjur Alla u min iħobbu.

Hemm eżami tal-kuxjenza li għandna nagħmlu biex nifhmu kemm-il darba tlifna u nitilfu l-orjentament tagħna lejn Ġesù. Ir-relazzjoni tad-dixxipli ma’ Ġesù u r-relazzjoni ta’ Ġesù mal-Missier tgħaqqadhom lilhom ukoll mal-Missier.

U Ġesù jħejji minn qabel lid-dixxipli tiegħu sabiex jibqgħu jemmnu fih u ma jħossuhomx waħedhom meta Hu jmur lura għand il-Missier għax hu ser jibqa’ ma’ dawk li jimxu warajh matul is-sekli. U dan ser jagħmlu permezz tal-Ispirtu s-Santu. Ġesù lill-Appostli—u lilna—għamlilhom wegħda solenni li jibagħtilhom Avukat Difensur, l-Ispirtu s-Santu: “Id-Difensur, l-Ispirtu s-Santu, li l-Missier jibgħat f’ismi, jgħallimkom kollox u jfakkarkom dak kollu li għedtilkom.” Jekk ma jkunx l-Ispirtu s-Santu li Ġesù jibagħtilna, kieku aħna ma niswew xejn. Imma Ġesù jagħtihulna fil-Magħudija u fil-Konfermazzjoni, u jkompli jagħtihulna bil-grazzji attwali tiegħu—l-għajnuniet li jagħtina fiċ-ċirkostanzi tal-ħajja tagħna.

Ma’ dan tiġi l-wegħda tas-sliem tal-Mulej. Mhijiex il-paċi ta’ xi żmien meta m’hemmx gwerra, mhux il-paċi kif tagħtiha d-dinja. Ma nitħawdux! Ma nibżgħux! Din hi l-Kelma tiegħu li tagħtina l-kuraġġ.

Talba

Mulej, agħtina l-grazzja li, jekk tassew inħobbuk, nilqgħu l-istedina tiegħek kollha mħabba, l-istedina li inti għamilt lid-dixxipli tiegħek li għexu miegħek u kielu u xorbu miegħek: l-istedina li nżommu u nħarsu l-Kelma tiegħek.

Għinna nkunu strumenti tal-grazzja tiegħek. Imla l-qalb tagħna bil-qawwa tal-Ispirtu Qaddis tiegħek. “Ejja,” nitolbuh bil-qalb lill-Ispirtu s-Santu! U meta jkollna problema, kelma żgħira: Spirtu s-Santu, agħtini d-dawl kif għandi nġib ruħi.

The post Aħna niġu u ngħammru għandu appeared first on Behold.