Ir-Raba’ Ħadd tar-Randan Sena A
Kolletta
O Alla, int b’mod tal-għaġeb terġa’ tħabbeb miegħek lill-bniedem permezz tal-Verb tiegħek: agħmel li l-poplu nisrani jitħejja b’qima kbira u fidi mħeġġa biex jiċċelebra l-festa solenni tal-Għid. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Fl-Evanġelju niltaqgħu ma’ diversi mumenti u ġrajjiet fejn Ġesù jistieden xi wħud li ltaqa’ magħhom biex jagħmlu għażliet fundamentali fil-ħajja tagħhom. Forsi l-aktar li niftakru hu l-mod kif għażel lit-Tnax u l-isfida li poġġa liż-żagħżugħ għani. Imma lil Ġesù nsibuh jistieden oħrajn biex jagħmlu għażliet simili. F’xi drabi din l-istedina jagħmilha lill-persuni li jkunu resqu lejh huma, bħall-għaref tal-liġi li staqsih min hu l-proxxmu tiegħu. Wara li rrakuntalu il-parabola tas-Samaritan it-Tajjeb, Ġesù jgħidlu li jekk irid ikun proxxmu għal ħaddieħor imur u jagħmel l-istess bħas-Samaritan. Lill-persuni oħra, bħal Żakkew, Ġesù jersaq lejhom hu u jagħmlilhom offerta li ma jkunux jistgħu jiċħduha. Meta Żakkew għażel li jilqa’ lil Ġesù f’daru, Ġesù qallu li “llum f’din id-dar daħħlet is-salvazzjoni.” Min jista’ jirreżisti offerta li jekk tagħżilha se tirċievi s-salvazzjoni?
Is-silta kemmxejn twila tal-Evanġelju tal-lum tirrakkonta mument ieħor fejn persuna li ltaqgħet ma’ Ġesù kellha tagħmel għażla fundamentali. Fid-disa’ kapitlu tal-Evanġelju tiegħu, San Ġwann jirrakkonta l-istorja tal-fejqan minn Ġesù ta’ raġel għama minn twelidu. Filwaqt li l-Ħadd li għadda t-tema prinċipali kienet l-ilma, illum hija d-dawl. Bl-istess mod ta’ kif il-mara Samaritana kienet kapaċi tara f’Ġesù dak li, iktar mill-għatx fiżiku, seta’ jaqtgħalha dak spiritwali, bl-istess mod dan ir-raġel għaraf jimxi mid-dawl fiżiku għal dak spiritwali, meta għaraf lil Ġesù mhux biss bħala dak li fejqu fiżikament imma bħala l-Mulej tiegħu. Dan il-proċess ta’ konverżjoni li għamel l-imwieled għama li rċieva d-dawl jikkuntrasta bil-qawwi mal-attitudni tal-Fariżej li, għalkemm kienu fiżikament jaraw, spiritwalment kienu fid-dlam għaliex ċaħdu li jagħrfu lil Ġesù bħala dak li tassew hu, l-Iben ta’ Alla.
Dan il-qari mill-Evanġelju skont San Ġwann iservi wkoll bħala t-tema tat-Tieni Skrutinju għal dawk li qed jippreparaw sabiex jirċievu is-sagramenti tal-Magħmudija, il-Griżma tal-Isqof u l-Ewkaristija fil-Vġili tal-Għid. Dawn il-magħżula huma mistiedna sabiex jeżaminaw lilhom infushom u jaraw kemm Ġesù huwa l-veru Dawl tagħhom: Kemm qegħdin iħarsu lejn il-ħajja minn għajnejn Ġesù? Kemm il-valuri tagħhom jixbhu lil dawk tas-saltna ta’ Alla kif irrevelata permezz ta’ Ġesù? Aħna wkoll mistiedna biex flimkien magħhom nagħmlu dan l-eżami tal-kuxjenza fi spirtu ta’ talb u sawm.
Talba
Missier il-Ħniena, inti mexxejt lir-raġel imwieled għama lejn is-Saltna tad-dawl permezz tal-għotja tal-fidi f’Ibnek. Eħlisna lkoll minn dak kollu li qed jagħmina. Wettaqna fil-verità tiegħek u agħmilna wlied id-dawl dejjiemi tiegħek. Ammen.
The post Ma’ Ġesù jew kontrih? appeared first on Behold.
Ikkummenta