Ħadd il-Għid
Solennità
Kolletta
O Alla, illum, b’Ibnek il-waħdieni, il-mewt ġiet megħluba, u int ftaħtilna l-bieb tal-ħajja ta’ dejjem: agħtina li, aħna u niċċelebraw il-festa solenni tal-qawmien tal-Mulej mill-imwiet, niġġeddu bl-Ispirtu Qaddis tiegħek u nqumu għad-dawl tal-ħajja. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.
Ammen.
Riflessjoni
“Sa dakinhar kienu għadhom ma fehmux l-Iskrittura li tgħid li kellu jqum mill-imwiet” (v. 9), hekk jgħidilna l-Evanġelista. Il-Qawmien ta’ Kristu mill-mewt huwa l-pedament tal-fidi u tal-ħajja nisranija, u għalhekk illum qegħdin nifirħu għaliex Kristu rebaħ fuq id-dnub u l-mewt.
Il-passjoni u l-mewt tal-Mulej Ġesù fuq is-Salib tefgħu lid-dixxipli fid-dlam, b’qalbhom imnikkta. Marija ta’ Magdala kienet baqgħet ma’ Ġesù taħt is-salib sal-aħħar, sa ma kollox kien mitmum. Hija kienet għadha fid-dlam tat-telfa, meta mqanqla mill-imħabba li kellha għall-Mulej hija marret waħedha ħdejn il-qabar fejn kienu difnuh u rat dak li ma stennitx, “il-blata mneħħija mill-qabar” (v. 1). L-ewwel ħaġa li ġietha f’moħħha kienet li kienu ħadulhom il-katavru ta’ Ġesù mill-qabar u issa ma kienux jafu fejn jinsab. Min jaf kemm xtaqet baqgħet għassa mal-qabar. Kriżi fuq kriżi. Mhux ta’ b’xejn li hija telqet tiġri, b’qalbha mnikkta u mtaqqla, biex tagħti l-aħbar lil Pietru u lid-dixxiplu l-maħbub li, għall-kliem ta’ Marija, huma wkoll ġrew flimkien lejn il-qabar. L-imħabba tagħhom għall-Mulej Ġesù qanqlet fihom sens ta’ urġenza biex joħorġu minn fejn kienu u jmorru huma wkoll ħdejn il-qabar fejn kienu difnu lil Ġesù.
Huma sabu l-qabar vojt għajr għall-faxex u l-maktur li kienu jixhdu li ħadd ma kien daħal fil-qabar bis-serqa biex jieħu l-ġisem ta’ Ġesù. L-Evanġelista jgħidilna li meta d-dixxiplu l-maħbub daħal fil-qabar, “ra, u emmen” (v. 8). Wara d-dlam tal-mewt feġġ id-dawl tal-qawmien. Il-qabar vojt kebbes qalb id-dixxiplu bl-imħabba u wasslu biex jara bl-għajnejn tal-fidi u jemmen fil-qawmien tal-Mulej mill-imwiet.
Forsi aktar faċli għalina norbtu s-Salib ta’ Kristu mal-imħabba ta’ Alla għalina milli l-Qawmien tiegħu mill-imwiet. X’valur għandu l-Qawmien ta’ Kristu fil-ħajja tagħna? Konxji li, kull min jirċievi s-sagrament tal-Magħmudija, imut ma’ Kristu biex ikollu sehem miegħu fil-Qawmien tiegħu għall-ħajja?
Talba
Alla tiegħi int, jien niżżik ħajr;
Alla tiegħi, jien lilek inkabbar.
Faħħru l-Mulej, għaliex hu tajjeb,
Għax għal dejjem it-tjieba tiegħu!
Salm 118, 28-29
The post Irxoxta mill-mewt Kristu Sidi appeared first on Behold.
Ikkummenta