Tieni Ħadd tal-Għid
Kolletta
O Alla ta’ ħniena bla tarf, matul dawn il-festi tal-Għid inti tħeġġeġ il-fidi tal-poplu qaddis tiegħek; qawwih ukoll fil-grazzja li tajtu, biex, kulħadd jifhem bid-dehen kollu b’liema ħasil tnaddaf, b’liema spirtu tnissel mill-ġdid, u b’liema demm infeda. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Ma nafx tħossuhiex intom, imma jiena jiġrili li nsib ruħi li lill-Mulej nitolbu biex bħal Tumas jistennieni ġimgħa oħra, biex jerġa’ jiġi l-Ħadd ta’ wara għalija. U nagħmel din it-talba għax ġieli fil-ħajja nsib ruħi bħal Tumas: magħluq fija nnifsi, mehdi bil-problemi u l-weġgħat tiegħi, mitluf fil-ħsibijiet tiegħi, distakkat ukoll minn ta’ madwari hekk li ma nindunax bil-bżonnijiet ta’ ħaddieħor, forsi wkoll ma nistax nitlob. U tant inkun aljenat u mħawwad li qisni ma nafx li l-Mulej qam mill-mewt. U bħal Tumas nibqa’ ’l barra mill-ferħ tal-aħbar it-tajba tal-qawmien u ma nesperjenzax il-ferħ li ġarrbu d-dixxipli meta ltaqgħu mal-Mulej.
Naħseb li lkoll f’xi waqt jew ieħor insibu ruħna bħal Tumas. Fortunatament, il-Mulej jerġa’ jiġi għalina u jibqa’ kull darba jiġi għalina, mhux biex iċanfarna jew jiġbdilna widnejna; mhux biex jgħidilna, “Imma kif ma titgħallem qatt! Kif kull darba ma temminx mill-ewwel, ma tafdanix!” Minflok, bħal Tumas, bis-sabar kollu jerġa’ jurina l-pjagi—sinjali tat-tbatija tiegħu, imma wkoll tal-umanità tiegħu—u jistedinna biex inpoġġu jdejna fuqhom.
U l-isbaħ biċċa tal-istorja hi li, fil-laqgħa ma’ Kristu ħaj, dak kollu li hu mewt fina, dak kollu li hu weġgħa fina, dak kollu li hu dell fina, in-niket tagħna … dawn l-esperjenzi qarsa li b’xi mod jagħlquna fina nfusna, ma jiġux injorati imma, fil-laqgħa tal-pjagi tagħna mal-pjagi ta’ Kristu, dawn isiru l-post fejn aħna nġarrbu l-imħabba, il-fejqan (jew tal-anqas nibdew nesperjenzaw il-fejqan). Imma hemm, fil-pjagi, jinsab is-sigriet. U jalla jkollna l-kuraġġ li mmissuhom il-pjagi tagħna u nħalluhom jintmissu mid-dawl li joħroġ mill-pjagi tiegħu, għax hu hekk biss li lil Ġesù naslu li nagħrfuh u nesperjenzawh fil-ħajja tagħna bħala l-Mulej tagħna u Alla tagħna. Jekk nibqgħu naħarbu mill-feriti tagħna, ser jibqgħu hemm u jibqgħu jdennu u jikkankraw.
Forsi Ġesù ser ikollu bħal Tumas jistenniena u jerġa’ jiġi għalina. Ma jimpurtax. Il-Mulej jiġi. Hekk jagħmel għalina kull nhar ta’ Ħadd, kuljum, fl-Ewkaristija. Imma jeħtieġ li bħal Tumas ma nibqgħux maqtugħin għalina imma nibqgħu marbutin mal-komunità għax hu hemm fejn il-laqgħa sseħħ. Huwa flimkien, bħala komunità, li nesperjenzaw il-grazzja tal-Mulej li ssalva. Hu permezz tal-komunità li jiġi jiltaqa’ magħna u jfittixna.
Talba
Grazzi, Mulej Ġesù, talli kull darba tibqa’ tistennieni. Agħmel li ssibni lesti biex inħallu l-ġrieħi tiegħi jiltaqgħu mal-pjagi tiegħek u nġarrab il-ferħ tal-qawmien fi ħdan il-Knisja, din il-komunità ta’ miġruħin, imma miġruħin li huma salvati u li jemmnu fil-qawwa ta’ dak li salvahom.
Ammen
The post Is-sliem għalikom! appeared first on Behold.
Ikkummenta