Tlettax-il Ħadd taż-Żmien ta’ Matul is-Sena
Kolletta
O Alla, int tajtna l-grazzja tal-adozzjoni u għamiltna wlied id-dawl: agħmel li qatt iżjed ma jaħkmuna d-dlamijiet tal-ħażen, imma nibqgħu dejjem imdawwla bid-dija tal-verità tiegħek. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Dan l-Evanġelju huwa parti mid-Diskors tal-Missjoni fejn Ġesù jkompli jiddeskrivi dak li jħabbtu wiċċhom miegħu d-dixxipli tiegħu. Jibda billi jpoġġilna l-prijoritajiet ċari quddiemna: li aħna maħluqin mill-imħabba ta’ Alla u biex inħobbuh. Allura l-missjoni tagħna fil-familja u fil-post tax-xogħol għandha tkun kontinwazzjoni u espressjoni ta’ din l-imħabba. Il-ħajja tagħna fil-familja għandha tkun ukoll mezz ta’ kif nxandru u ngħixu l-Bxara t-Tajba.
Imbagħad jgħaddi biex jpoġġihielna ċarha wkoll li min jimxi warajh se jsib l-iebes. Il-presekuzzjoni jew li tiġi mwarrab huma il-konsegwenzi tal-għażla libera ta’ dawk li jridu jimxu wara Kristu bis-serjetà. Għalhekk, meta aħna nitkellmu għall-verità jew għall-ġustizzja, jew meta aħna nagħmlu dak li hu sewwa, irridu nistennew li nsibu l-opposizzjoni. U f’dan is-sens inkunu qed nitilfu ħajjitna. Iċ-ċentru ta’ ħajjitna ma jibqax aħna jew il-‘jien’ imma il-valuri li ħadem għalihom Kristu. U, għalkemm dan forsi ma jagħmilx sens f’għajnejn id-dinja, Kristu jgħidilna li b’hekk biss nirbħu l-ħajja: il-veru libertà u paċi.
L-Evanġelju jagħlaq bil-wegħda li hu u l-Missier se jibqgħu ma’ dawk li jxandruh u b’hekk id-dixxiplu jsir jixbah aktar lil Kristu. Id-dixxiplu jsir bħal mera fejn fiha nistgħu nilmħu l-imħabba ta’ Alla. Imma Ġesù jenfasizza li mhux bil-kliem biss għandna nxandruh imma bl-għemil ukoll. Ġesù jitkellem fuq ġest sempliċi li ma jiswiex ħafna: li toffri tazza ilma. U hawn tajjeb li nirrealizzaw kemm bil-ġesti kollha, anke dawk daqstant sempliċi li nagħmlu, inkunu qed nibnu s-Saltna ta’ Alla fid-dinja. Biex inbiddlu id-dinja m’għandniex biss bżonn id-deċiżjonijiet politiċi jew tan-nies fil-poter, imma anke ġesti sempliċi ta’ ħlewwa, kif jgħid il-Papa Franġisku fl-enċiklika tiegħu Fratelli Tutti:
“Illum qajla għadek issib min għandu ħin u enerġija biex jieqaf ftit ħalli jittratta tajjeb lill-oħrajn, biex jgħid, “jekk jogħġbok,” “skużani,” “grazzi.” Imma kull tant jinqala’ xi miraklu ta’ persuna ġentili, li twarrab għall-ġenb l-inkwiet tagħha u l-bżonnijiet urġenti tagħha biex tagħti attenzjoni, biex tirregala tbissima, biex tlissen kelma ta’ tħeġġiġ, biex tagħmel possibbli spazju ta’ smigħ qalb tant indifferenza … Il-prattika tal-ħlewwa mhix xi dettall sekondarju u lanqas imġiba superfiċjali jew tal-puliti. Bl-istima u r-rispett li titlob, meta ssir kultura f’soċjetà, tibdel qatigħ l-istil ta’ ħajja, ir-relazzjonijiet soċjali, il-mod ta’ kif niddibattu u nħabbtu l-ideat tagħna ma’ xulxin.” par. 224
Talba
Mulej, quddiem l-għażla tagħna bħala dixxipli u mibgħuta tiegħek, agħtina qalb ħelwa, anke meta nsibu ruħna minn taħt. Agħmel li ċ-ċiniċiżmu jew ir-reżistenza li nsibu jaqtgħulna qalbna milli nibqgħu nagħżlu t-tajjeb fuq kollox.
The post min jilqa’ lilkom ikun jilqa’ lili appeared first on Behold.
Ikkummenta