It-Tielet Ħadd tal-Għid
Kolletta
O Alla, jifraħ dejjem il-poplu tiegħek biż-żgħożija mġedda ta’ ruħu, biex, kif int sebbaħtna u ferraħtna mill-ġdid bil-grazzja tal-adozzjoni, hekk ukoll, b’qalbna qawwija fit-tama, nistennew il-jum tal-qawmien mill-imwiet. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Ir-rakkont taż-żewġ dixxipli fi triqthom lejn Għemmaws ġie kkummentat ħafna u ħafna drabi għax hu ta’ valur kbir għad-dixxipli ta’ kull żmien u kull pajjiż.Xi wħud mill-missirijiet tal-Knisja jagħrfu lil dawn iż-żewġ dixxipli bħala tnejn mit-72 li Ġesù kien bagħathom wara li bagħat lit-Tnax. Jgħidu li Kleofa kien iz-ziju ta’ Ġesù (ħu San Ġużepp) u sieħbu kien jismu Xmun. Kienu ħbieb u aħwa fi Kristu.
Żgur li fir-rakkont, jidher ċar kemm kienu mħawwdin u mifxulin bl-esperjenza tal-mewt ta’ Ġesù. Din kienet kriżi kbira ta’ fidi. Wieħed mid-dixxipli jwieġeb lil dar-raġel fit-triq, “Aħna konna nittamaw … konna nemmnu … imxejna warajh … imma minkejja li Ġesù kien wera li kien qawwi u setgħan f’għemilu, ħsiebna li kien il-Messija, imma jidher li falla u aħna ninsabu ddiżappuntati.”
Min qatt ma għadda minn esperjenza bħal din? Kultant il-fidi tagħna tidħol fi kriżi, li minħabba esperjenzi negattivi, iġġagħalna nħossuna abbandunati u ttraduti mill-Mulej. Imma din il-ġrajja ta’ Għemmaws turina li, anke llum, hu possibbli li Ġesù jiltaqa’ magħna u aħna miegħu.
Hemm żewġ mumenti fejn Ġesù jkollu impatt fuq id-dixxipli. L-ewwel meta ltaqa’ magħhom fejn kienu. “Our disappointments are God’s appointments.” Hekk turi l-esperjenza ta’ ħafna u ħafna dixxipli madwar id-dinja matul is-sekli. Id-djalogu bejn Ġesù u d-dixxipli hu eżempju tad-djalogu li Ġesù jixtieq li jkollu miegħek, int fejn int. Isibek fl-iktar mumenti mudlama tal-fidi tiegħek. Tintebaħ b’din ir-realtà? Għaddej minn żmien ta’ konfużjoni? Għandek ħbieb li taqsam magħhom id-diżappunti tiegħek?
Matul din il-laqgħa, Ġesù jiftaħ moħħhom għall-verità tal-Iskrittura hekk li jaslu biex jistqarru, “Ma kinitx imkebbsa qalbna ġewwa fina huwa u jkellimna fit-triq u jfissrilna l-Iskrittura?” Kemm int familjari mal-Iskrittura? Kemm tħalliha titfagħlek dawl fuq is-sitwazzjonijiet, l-emozzjonijiet, u l-mixja tiegħek?
It-tieni mument huwa meta jaqsam il-ħobż quddiemhom. Kemm qed tkun esperjenza profonda ċ-ċelebrazzjoni tal-Ewkaristija għalik? Forsi saret rutina, ritwal kwalunkwe? Għal dawn iż-żewġ ħbieb, il-qsim tal-ħobż serva biex, “infetħulhom għajnejhom u għarfuh.” Din hi l-esperjenza tiegħek? Jekk le, għaliex? Din l-esperjenza hi riżultat ta’ mixja, ta’ vjaġġ spiritwali.
Talba
Ġesù, inti tixtieq tiltaqa’ miegħi u tiġi tfittixni fit-triq tal-ħajja tiegħi. Iftaħli għajnejja biex nagħrfek kull darba li sseħibni fil-vjaġġ u wassalni biex nagħrfek.
Ammen
The post Infetħulhom għajnejhom u għarfuh! appeared first on Behold.
Ikkummenta