L-Imqaddsa Omm Alla Marija
Solennità
Kolletta
O Alla, int ridt li l-Imqaddsa Marija ssir Omm Ibnek u tibqa’ Vergni, u hekk offrejt lill-bnedmin kollha l-ġid ta’ salvazzjoni għal dejjem; agħmel li nħossu l-qawwa tat-talb tagħha għalina, aħna li biha lqajna lil min tana l-ħajja, Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
L-ewwel jum tas-sena l-Knisja Kattolika tiddedikah lil Ommna Marija—Omm Alla. Marija Omm Alla għaliex binha Ġesù hu Alla u bniedem. Min jemmen fl-inkarnazzjoni jemmen f’dan ukoll, jiġifieri li Marija tista’ tissejjaħ bit-titlu ta’ Omm Alla.
L-istess jum hu meqjus ukoll bħala Jum il-Paċi. Kull fejn insibu lil Ommna Marija, fl-Evanġelju u fid-dehriet tagħha lill-umanità, il-preżenza tagħha u l-messaġġ tagħha dejjem kienu ta’ paċi. Ġaladarba Binha Ġesù ġie fid-dinja sabiex nerġgħu niksbu l-paċi, mela Ommu Marija paċi biss taf twassal lill-umanità. Kemm għandna bżonn tal-paċi vera u dejjiema!
Sa ftit ilu ħsiebna li ċertu progress se jqarribna lejn xulxin. Il-pandemija għenitna niskopru li dan mhux minnu għalkollox. Hemm ħafna pożittiv, imma sfortunatament l-individwaliżmu għolla wisq rasu u għeleb it-tajjeb li bosta ħadmu għalih!
Huwa fis-solidarjetà ta’ bejnietna u fl-għaqda fraterna li nistgħu mill-ġdid insibu l-paċi vera. Nemmen li l-kriżijiet personali, dawk fis-soċjetà ta’ madwarna, u fid-dinja, jistgħu jingħelbu biss bil-bini u t-tisħiħ tal-komunità—ta’ komunità ta’ veru, u mhux niċeċ ta’ komunitajiet. Dawn joħolqu territorjaliżmu u piki, u dan kollu xi rriduh!
Tajjeb li nitolbu għall-paċi. Hekk għandna nagħmlu. Imma dan mhux biżżejjed: hemm bżonn li naħdmu għall-paċi bil-preżenza tagħna, bix-xhieda u bl-għemil. B’rieda tajba u bil-ftit ta’ kull wieħed u waħda minna, bis-solidarjetà ta’ xulxin u lejn xulxin, nistgħu nibnu flimkien il-komunità. Il-fidi f’Alla, il-fiduċja fit-tajjeb li hemm f’kull bniedem, l-imħabba diżinteressata li l-umanità għandha tant għatx għaliha jsaħħu t-tama li flimkien nistgħu nibnu l-komunità umana.
Ieqaf u aħseb
– Hemm paċi fik? Jekk m’hemmx, ara għaliex. Aktar ma jkun hemm paċi fik, aktar tista’ taħdem għall-paċi.
– Kemm qed taħdem għall-għaqda fil-komunità fejn qed tgħix, taħdem u tiddeverti?
– Dak li tgħid u tikteb qed iġib paċi?
Talba
Marija, Omm Ġesù u ommna, tħalliniex inqimuk bix-xuffejn biss. Għinna nersqu lejn Ibnek sabiex nagħmlu l-almu tagħna ħalli nkunu strumenti ta’ paċi u ta’ għaqda fil-fraternità.
Ammen
The post Sabu lil Marija u lil Ġużeppi, bit-tarbija mimduda f’maxtura appeared first on Behold.
Ikkummenta