Ħdax-il Ħadd taż-Żmien ta’ Matul is-Sena
Kolletta
O Alla, qawwa ta’ min jittama fik, ieqaf magħna li qegħdin insejħulek, għax aħna bnedmin dgħajfa li mingħajrek ma nistgħu nagħmlu xejn; agħtina dejjem l-għajnuna tal-grazzja tiegħek biex inħarsu l-kmandamenti tiegħek, ħalli nogħġbuk fir-rieda u l-għemil tagħna. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
Riflessjoni
Fl-Evanġelju ta’ dan il-Ħadd naqraw l-ewwel biċċa tat-tieni diskors minn ħamsa li jagħtu struttura lill-Evanġelju skont San Ġwann. Dan id-diskors jitkellem fuq min hu d-dixxiplu li jintbagħat u dak li se jkollu jħabbat wiċċu miegħu waqt li jwettaq il-missjoni li għaliha ntbagħat.
U allura, nistgħu ngħidu li dawn il‑ftit vrus ilaqqgħuna mal‑mumenti l‑iktar bikrin tal‑familja tal-Mulej fuq l-art: il‑Knisja. Għax iħares lejn l‑umanità u jaraha mifxula u mxerrda, Ġesù jibda jqiegħed is‑sisien biex bil‑mod il‑mod jibni l‑Knisja li permezz tagħha l-aħbar t-tajba tasal għand kulħadd.
Fl-istess waqt, naraw li din l-għażla ta’ Kristu ħierġa mill-għarfien b’mod mill-iktar profond tas-sitwazzjoni ta’ iżolament li fiha kienu n-nies: “tħassarhom.” Quddiem din is-sitwazzjoni kważi ta’ qtigħ il-qalb, Ġesù jara opportunità: idur fuq id-dixxipli u jgħidilhom, “Il-ħsad huwa kbir, iżda l-ħaddiema ftit. Itolbu mela lil Sid il-ħsad biex jibgħat ħaddiema għall-ħsad tiegħu.” Kif anke jagħmel f’xi parabboli, Ġesù jiddeskrivi d‑dinja, l‑umanità, bħala ħsad kbir. Għalkemm ta’ spiss il‑ħsad huwa simbolu tal‑ġudizzju aħħari, hawn u fi bnadi oħra, il‑ħsad huwa wkoll ġudizzju li jsalva fejn hemm il‑frott.
Imma dan il-kliem ifakkarna wkoll li l‑ħsad mhuwiex tagħna imma ta’ Alla. Il-Missier hu Sid il‑ħsad, il‑bidwi li jiżbor id‑dielja (ara Ġw 15, 1-2). Għaldaqstant, Ġesù jitlob għall-ħassada għax il‑frott mhux huma jimmaturawh imma l‑Ispirtu Qaddis.
Fl-istess waqt, minkejja li l‑ħsad huwa kbir, Ġesù jiffoka fuq “in-nagħaġ il-mitlufa tad-dar ta’ Iżrael” għalissa. Huwa wara l-qawmien li mbagħad jiġu mibgħuta fid-dinja kollha. Imma biex din il-missjoni estiża għal wiċċ l-art kollha, l-ewwel trid tibda f’post konkret, f’sitwazzjoni u kultura konkreta, ma’ nies konkreti—kif wara kollox jeħtieġ li nagħmlu aħna meta bħala mgħammdin nilqgħu l-missjoni ta’ Ġesù li jibgħatna bħala messaġġiera li jagħmluh preżenti mhux kullimkien fid-dinja imma, kull wieħed u waħda minna, fil-post partikolari fejn insibu ruħna.
Talba
Mulej, b’disponibbiltà imma wkoll b’interċessjoni, nitolbuk tħares lejn il‑ħsad kbir tiegħek u tibgħat ħaddiema għalih ħalli l‑Evanġelju jixxandar lill‑umanità kollha, u l‑poplu tiegħek ikun jista’ jibqa’ jinġabar għas‑smigħ tal‑Kelma u jissaħħaħ bis‑sagramenti, u hekk jimxi ’l quddiem fit‑triq tas‑salvazzjoni u l‑imħabba. Ammen.
The post Ġismi huwa tassew ikel, u demmi hu tassew xorb appeared first on Behold.
Ikkummenta